.jpg)
अनिल पराजुली
हेटौँडा, वैशाख ४ गते । पूर्वी मकवानपुरको बकैयामा रङ्गशाला निर्माणका लागि श्रीमद्भागवत सप्ताह ज्ञान महायज्ञ लगाइएको छ । जुरेली रङ्गशाला निर्माण समिति बकैया –४ ले रङ्गशाला निर्माणमा सहयोग जुटाएको हो ।
करिब तीन बिघा क्षेत्रफलमा रहेको यस क्षेत्रमा कभर्ड हल, बास्केटबल, टेबल टेनिस, भलिबल, फुटबल मैदानलगायतका खेल खेलाउनेगरी रङ्गशाला निर्माण गर्न लागिएको समितिका अध्यक्ष विमल नेपालले जानकारी दिनुभयो ।
बकैया गाउँपालिकाभित्रको खेलमैदानमध्येको जुरेली खेल मैदान उत्कृष्ट भएकाले रङ्गशालाका रुपमा विकास गर्न जुरेली खेलमैदानका लागि स्थानीयसँग १५ कठ्ठा क्षेत्रफल जग्गा खरिद गरेकाले त्यसको भुक्तानी गर्न महायज्ञ लगाइएको उहाँले बताउनुभयो ।
‘बजेट सुनिश्चित्ताका लागि हामीले महायज्ञ लगाएका हौं, सबैले सहयोग गर्नुभयो भने राम्रो रङ्गशाला निर्माण हुनेछ ।’ महायज्ञमा सोमवारसम्म १९ लाख ९६ हजार ५८६ रुपियाँ सङ्कलन भएको छ । महायज्ञको पहिलो दिन ७ लाख ५० हजार २१७, दोस्रो दिन ३ लाख र तेस्रो दिन ७ लाख ७२ हजार ८६५ रुपियाँ सङ्कलन भएको समितिका कोषाध्यक्ष प्रल्हाद गौतमले जानकारी दिनुभयो ।
रङ्गशाला निर्माणका लागि करिब डेढ करोड रुपियाँ उठाउने लक्ष्य राखिएको महायज्ञ सञ्चालकको भनाइ छ । महायज्ञमा प्रखर पण्डित कपिलदेव भट्टले कथावाचन गरिरहनुभएको छ ।
दैनिक सयौँको सङ्ख्यामा भक्तजन कथा श्रवण र रङ्गशाला निर्माणका लागि सहयोग उपलब्ध गराउन आइरहनुभएको छ । ३० चैतबाट सुरु भएको महायज्ञ वैशाख ७ गते समापन हुनेछ ।
