काठमाडौं, मङ्सिर ८ गते । लेखक तथा निर्देशक लक्ष्मण सुवेदीको चलचित्र ‘सतीदेवी’ को फर्स्टलुक पोस्टर सार्वजनिक गरिएको छ । नारी प्रधान चलचित्र ‘सतीदेवी’को फर्स्टलुक पोस्टरमा केन्द्रीय भूमिकामा रहेको अभिनेत्री मलिका महत फिचर्ड हुनुहुन्छ ।
सार्वजनिक पोस्टरमा मलिका महतलाई जुत्ताको मालासहित कालोमोसो लगाइएको देख्न सकिन्छ ।
यस्तै, पोस्टरमा लेखिएको छ, ‘ईश्वरको उपहार, सृष्टि धान्छन्, होइनन् कर्महारा । छोरी बुझौं, छोरी बुझौँ, यिनै संसार सारा । यो लेखाइले चलचित्र नारीको कथामा रहेको पुष्टि गर्दछ ।
चलचित्रमा महतसँगै रमेश बुढाथोकी, भोलाराज सापकोटा, कुलदीप अधिकारी, सन्दीपबाबु लोहनी, सृजना अधिकारी, मनीषा सापकोटा, सुजिता शिवाकोटी, तुलसी श्रेष्ठ, ईश्वरी सिंह, सन्देश लिम्बू, पवन केसी, जगदीश अधिकारीलगायतको अभिनय छ । दिलाशा र साराको प्रस्तुति रहेको फिल्मको निर्माता श्रीदेवी, दिलाशा र सारा सुवेदी हुनुहुन्छ।
दिलाशा क्रिएसन तथा गोल्डेन स्टेट मुभी मेकर्स एलएलसी क्यालिफोर्नियाको सहकार्यमा निर्माण भएको चलचित्रमा निर्देशक सुवेदीकै कथा, पटकथा, संवाद छ । बाबु श्रेष्ठले छायाङ्कन गर्नुभएको यस चलचित्रमा दीपक शर्मा र सुवास भुसालको सङ्गीत छ भने रामजी लामिछानेको कोरियोग्राफी छ । काठमाडौं र लमजुङको विभिन्न स्थानमा छायाङ्कन भएको चलचित्रको हाल पोस्ट प्रोडक्सनको कार्य अन्तिम चरणमा छ ।
चलचित्रको प्रदर्शन मिति भने सार्वजनिक गरिएको छैन ।
