काठमाडौँ, भदौ ९ गते । आमा पनि नक्कली बनाइन्छ भन्ने सुन्दा अचम्म लाग्छ । तर मकवानपुरको थाहा नगरपालिकाका एक व्यक्तिले नक्कली आमा बनाएर अर्कैका नामको जग्गा आफ्नो नाममा हत्याएका छन् ।
यस घटनामा कीर्तिपुर र थाहा नगरपालिकाका जनप्रतिनिधिको पनि संलग्नता रहेको छ । जग्गामा रकम हाल्ने भारतीय नागरिकको जाहेरीपछि मात्र यो घटना सार्वजनिक भएको हो । प्रहरीले दुई जना वडाध्यक्षसहित २१ जनाविरुद्ध गत साउन २८ गते काठमाडौँ जिल्ला अदालतमा मुद्दा दायर गरेको छ ।
घटना विवरण अनुसार कीर्तिपुरको महँगो जग्गा हात पार्न थाहा नगरपालिका–१२ का सतराज गुरुङले नक्कली आमा खडा गराएर सबै प्रक्रिया पूरा गरेका थिए । यस कार्यमा मकवानपुरको थाहा नगरपालिका–१२ का वडाध्यक्ष टीकाराम स्याङ्तान र कीर्तिपुर नगरपालिका–१० का वडाध्यक्ष नरेश महर्जनको सहयोग रहेको छ । काठमाडौँको कीर्तिपुर नगरपालिका–१० स्थित ट्याङ्लाफाँटको कित्ता नम्बर २०३ को ९९२ वर्गमिटर अर्थात् एक रोपनी १५ आना जग्गा गुरुङले आफ्नो नाममा गरेको पाइएको हो ।
भारतीय नागरिक एमसी परेराले उक्त जग्गा किनेर राख्नु भएको थियो । जिल्ला प्रहरी परिसर काठमाडौँका प्रहरी वरिष्ठ उपरीक्षक दानबहादुर कार्कीका अनुसार भारतीय नागरिक परेराले श्रीमती बनाएका उमादेवी गुरुङको नाममा जग्गा किन्नुभएको थियो । उनीहरूका सन्तान थिएनन् ।
“भारतीय नागरिकले सीधै जग्गा किन नमिल्ने भएपछि उमादेवी गुरुङको नाममा जग्गा किनिएछ । त्यसमा क्रिस्चियन मिसिनरी सञ्चालन गर्न जग्गा खरिद भएको रहेछ,” उहाँले भन्नुभयो, “उमादेवी गुरुङको निधनपछि उनको नाममा भएको जग्गालाई मकवानपुर थाहा नगरपालिका–१२ का सतराज गुरुङले नक्कली आमा बनाएर किर्ते कागज बनाई आफ्नो नाममा लिएको पाइयो ।”
त्यसका लागि भरतपुर महानगरपालिका वडा नम्बर–१९ बाट उमादेवीको मृत्यु दर्ता प्रमाणपत्र बनाएको पाइएको छ । मृतक गुरुङका आफन्त नभएपछि स्वतः राज्यको हुनुपर्नेमा सतराज गुरुङले उमादेवीको चितवनमा मृत्यु दर्ता गराएर आफ्नो नाममा राखेको पाएको प्रहरी वरिष्ठ उपरीक्षक
कार्कीले बताउनुभयो । सतराजले उक्त जग्गा आफ्नो नाममा किर्ते गरेर लिएको थाहा भएपछि भारतीय नागरिक परेराले उमादेवी मेरी श्रीमती रहेको भनी प्रहरीमा उजुरी दिएपछि सबै घटना सार्वजनिक भएको हो ।
सतराज गुरुङका नाममा जग्गा नामसारी गराउन सहयोग गर्ने दुई वडाध्यक्षसहित २१ जनाको नाममा जिल्ला अदालत काठमाडौँबाट पक्राउ पुर्जी जारी भइसकेको छ । मकवानपुरको थाहा नगरपालिका–१२ का वडाध्यक्ष स्याङ्तान र कीर्तिपुर नगरपालिका–१० का वडाध्यक्ष महर्जनसहितका नाममा पक्राउ पुर्जी जारी भएको हो । भारतीय नागरिक परेराले उजुरी दिएलगत्तै सतराज गुरुङ भने पक्राउ परेका छन् भने स्याङ्तान र महर्जन फरार रहेको प्रहरीले जनाएको छ । सतराजको नागरिकतासहित जग्गा खरिदमा सहयोग गर्ने दुई वडाध्यक्षसहित थाहा नगरका १२ जना स्थानीयवासी र कीर्तिपुर–१० का छ जना स्थानीयवासीसहित मालपोत कार्यालय कलङ्कीका खरिदार सुदीप ढकाललाई पक्राउ पुर्जी जारी गरिएको छ ।
उहाँ राजनीति र समसामयिक विषयमा रिपोर्टिङ गर्नुहुन्छ ।
