राधा नेपाली
सन्धिखर्क, साउन ९ गते । अविरल वर्षाका कारण गोरुसिङ्गे-सन्धिखर्क सडक अवरुद्ध बनेको छ । अर्घाखाँचीको नरपानी, घुम्ती, दहखोला, भुवनपाटा र ठाडामा पहिरोले सडक पुरेपछि यातायात अवरुद्ध भएको हो ।
साना-ठुला गरी विभिन्न स्थानमा झण्डै एक दर्जनको सङ्ख्यामा पहिरो गएको इलाका प्रहरी ठाडाले जनाएको छ । यस्तै, गोरुसिङ्गे-सन्धिखर्क सडक विस्तारको काम भइरहेको छ भने अधिकांश पहिरो सडक विस्तार गरिएको स्थानमै गएको हो ।
मङ्गलबार बिहानदेखि अवरुद्ध भएको पहिरो हटाउन डोजर (एक्स्काभेटर) समेत परिचालन गरिएको छ । फुदवाङ, दहखोला, नरपानी, घुम्ती, अमराई लगायतका ठाउँमा स्थानीय तहको समन्वयमा डोजरले पहिरो हटाउने कार्य भइरहेको प्रहरी नायब उपरीक्षक मुकुन्द रिजालले बताउनुभयो ।
धेरै स्थानमा पहिरो गएकाले सडक अवरुद्ध हटाउन केही समय लाग्ने उहाँको भनाइ छ । सडक अवरुद्ध भएपछि बिहानैदेखि यात्रुहरू सडकमै अलपत्र परेका छन् । छत्रदेव गाउँपालिकाको छत्रगञ्ज, चोरझुण्डामा पहिरो गएपछि सन्धिखर्क-तम्घास सडक पनि अवरुद्ध भएको छ ।
पहिरोले सडक अवरुद्ध भएपछि राेकिएका सवारी साधन र अलपत्र यात्रु । तस्बिरः राधा नेपाली