इस्लामावाद, असोज ६ गते । पाकिस्तानका बाढी प्रभावित क्षेत्रमा डेंगुको प्रकोप बढेको छ । अधिकारीहरूले यहाँका बाढी प्रभावित क्षेत्रहरूमा डेंगुको प्रकोप बढ्दै गएको जानकारी दिएका हुन् ।
पाकिस्तानका विशेषगरी पछिल्लो समयमा यस वर्षको मनसुनबाट क्षति भएका क्षेत्रहरूमा डेंगुको ज्वरोले धेरै मानिस बिरामी परेका बताइएको हो ।
यहाँको सबैभन्दा धेरै बाढी प्रभावित प्रान्त सिन्धमा नै डेंगुले पनि सताएको बताइएको छ । यहाँका स्वास्थ्य अधिकारीले दिएको जानकारीमा गएको २४ घण्टा यतामात्र यहाँका तीन सय २३ जनालाई डेंगु लागेको छ ।यसपछिको प्रभावित क्षेत्र कराँची पनि हो । कराँचीमा मात्र यहाँ गएको २४ घण्टामा दुई सय ६० जनामा यसको सङ्क्रमण देखिएको छ ।
कराँची पनि यस वर्षको मनसुनी वर्षाबाट बढी प्रभावित क्षेत्र हो । सेप्टेम्बर महिनामा मात्र सिन्धमा करिब चार हजार जनामा डेंगुको सङ्क्रमण भएको थियो । यहाँ अहिलेसम्म छ हजार जनाभन्दा बढीमा यो प्रकोप देखिएको सिन्ध प्रान्तको स्वास्थ्य विभागका प्रमुखले जानकारी दिएका छन् ।
ती अधिकारीका अनुसार बाढी प्रभावित भएर घरबारविहीन हुन पुगेका नागरिकमा यस्तो प्रकोप देखिएको पाइएको समाचारमा जनाइएको छ । यहाँको खैबर पाक्थुन्क्वामा पनि डेंगुको प्रकोप बढ्दो देखिएको छ । यहाँ पनि यसवर्ष मात्र कम्तीमा पाँच हजार जनामा यो सङ्क्रमण देखिएको खैबरको स्वास्थ्य विभागका प्रमुखले जानकारी दिएका छन् । रासस/सिन्ह्वा
