राजन रावत
हुुम्ला, भदौ ३० गते । नाम्ला गाउँपालिका – ६ को हिमालपारिको गाउँ लिमीमा मोबाइल सेवा सञ्चालनमा आएको छ । नेपाल टेलिकमको मोबाइल टावर निर्माण कार्य पूरा हुँदा मोबाइल सेवा सञ्चालनमा आएको हो ।
लिमीका वडा अध्यक्ष पाल् जोर तामाङले नेपाल टेलिकमको मोबाइल सेवा लिमाकी तीन गाउँमा सुचारु भएको बताउनुभयो । उहाँले मोबाइल सेवा सञ्चालनमा आएपछि लिमीबासी पूर्ण रूपमा सञ्चारको पहुँचमा पुगेको बताउनुभयो ।
उहाँले लिमीवासीको मोबाइलमा कुरा गर्ने सपना बल्ल पूरा भएको बताउनुभयो । यसअघि लिमीमा सञ्चारको माध्यम भनेको टेलिकमकै एक लाइन भिस्याट ल्याण्ड लाइन टेलिफोन सेवा थियो । अब लिमीका तीन वटै गाउँ, तील, हल्जी र जाङ्ग गाउँमा मोबाइल सेवा सुचारु भएको छ ।
गाउँपालिकाका प्रमुख प्रशासकीय अधिकृत धर्मराज न्यौपानेले निक्कै प्रयासका बाबजुद लिमीमा टावर निर्माण कार्य पूरा भएर मोबाइल सेवा सञ्चालनमा आएको बताउनुभयो । लिमीमा हाल सञ्चालनमा आएको नेपाल टेलिकमको टुजी मोबाइल सेवा हो । यसअघि नाला लेकमा टेलिकमले टावर निर्माण गरेर यारी क्षेत्रमा मोबाइल सेवा सञ्चालनमा आएको थियो ।
