लमजुङ, भदौ २५ गते । हिमानी ट्रस्टले लमजुङका करिब ३ हजार विद्यार्थीलाई शैक्षिक सामग्री सहयोग गरेको छ । शुक्रवार बेंसीशहरमा एक कार्यक्रमको आयोजना गरी ट्रस्टले लमजुङका विद्यार्थीलाई शैक्षिक सामग्री वितरण गरेको हो ।
ट्रस्टका अध्यक्ष एवं पूर्व युवराज्ञी हिमानी शाहले लमजुङको दोर्दी गाउँपालिका, मर्स्याङ्दी गाउँपालिका र दूधपोखरी गाउँपालिकाका प्राथमिक तहमा अध्ययनरत छात्रछात्रालाई शैक्षिक सामग्री हस्तान्तरण गर्नुभएको हो । १ हजार ४ सय ६९ छात्र र १ हजार ४ सय ६३ जना छात्रा गरी २ हजार ९ सय ३२ जना विद्यार्थीलाई शैक्षिक सामग्री सहयोग गरेको ट्रस्टले जनाएको छ । गरिबीका कारण कुनै पनि बालबालिका पढाइबाट वञ्चित हुन नपरोस् भन्ने लक्ष्यका साथ ट्रस्टले दूर दुर्गमका विद्यालयमा अध्ययनरत विद्यार्थीलाई शैक्षिक सामग्री वितरण गरेको हो । उक्त कार्यक्रममा ट्रस्टका अध्यक्ष एवं पूर्व युवराज्ञी हिमानी शाह, उहाँको छोरी कृतिका शाह र ट्रस्टका पदाधिकारीको सहभागिता थियो ।
चाइना फाउन्डेसनको सहयोगमा गोर्खा र लमजुङका करिब ६ हजार विद्यार्थीलाई शैक्षिक सामग्री सहयोग गर्ने योजना अन्तर्गत शुक्रवार हिमानी ट्रस्टको टोली लमजुङ आइपुगेको हो । ट्रस्टले लमजुङका बालबालिकालाई स्कुल झोला, कपी, पुस्तकसहित शैक्षिक सामग्री वितरण गरेको हो ।
ट्रस्टका अध्यक्ष एवं पूर्व युवराज्ञी हिमानी शाहले अन्य मुलुकमा गरेको अध्ययन र सिकेको सीपलाई आफ्नै देश निर्माणमा खर्चनुपर्ने बेला आएको बताउनुभएको छ । एकता र भावनात्मक रूपमा अडिग रहेर शिक्षा, स्वास्थ्य, संस्कृति, कृषि र सामाजिक विषयलाई विकासमा रूपान्तरण गर्दै अगाडि बढ्नु आवश्यकता रहेको बताउनुभयो । देशमा रहेको अस्थिर राजनीतिक माहौलले देशप्रतिको कर्तव्य र दायित्वबाट भाग्न बाध्य बनाएको उहाँको भनाइ थियो ।
कार्यक्रममा चाइना फाउन्डेसनका कविन नेपाली, दोर्दी गाउँपालिका विद्यालय निरीक्षक काशीनाथ अधिकारी, शिक्षा विकास तथा समन्वय एकाइ लमजुङका प्रमुख वीरबहादुर गुरुङलगायत दोर्दी, मर्स्याङ्दी र दूधपोखरी गाउँपालिकाका शिक्षक, विद्यार्थीको उपस्थिति थियो । ट्रस्टका अध्यक्ष हिमानी शाहसहितको टिमलाई मनाङे चौतारा आमा समूहले भव्य स्वागत गरेको थियो ।
उहाँ गोरखापत्र प्रकाशनका लागि लम्जुङ समाचारदाता हुनुहुन्छ ।
