कोहलपुर, फागुन २४ गते । ११५ औँ अन्तराष्ट्रिय नारी दिवसको अवसरमा नेपालगन्ज उपमहानगरपालिद्वारा गोरखापत्रकर्मी साबित्री गिरी सम्मानित हुनुभएको छ । गिरी सहित ६ कार्यक्रममा उद्योगी, पत्रकार र सामाजिक अभियन्ता गरी ६ जना महिलालाई सम्मान गरिएको हो ।
सम्मानित हुनेहरूमा महिला उद्यमीतर्फ आशा शार्की, लक्ष्मी बम र नानीमाया पुरी रहनुभएको छ । यसैगरी क्रियाशिल पत्रकार महिलातर्फ साबित्री गिरी र रूपा गहतराज सम्मानित हुनुभएको छ भने सामाजिक अभियन्तातर्फ शाहिदा बानो सम्मानित हुनुभएको छ । यस पटकको नारी दिवसको नारा “सबै महिला तथा बालिकाका लागि ःअधिकार ,समानता र सशक्तीकरण” रहेको छ ।
महिला अधिकारका क्षेत्रमा काम गर्नेहरू नेपालगन्जमा एकजुट भएर ११५ औँ अन्तराष्ट्रिय नारी दिवस मनाएका हुन् । दिवसका अवसरमा नेपालगन्ज उपमहानगरपालिकाबाट सुरु भएको र्याली विपीचोक, धम्बोजीचोक, सेतुविक चोक, न्युरोड, त्रिभुवन चोक हुँदै पुनः नेपालगन्ज उपमहानगरपालिकामा पुगेर कार्यक्रममा परिणत भएको थियो ।
आयोजक मूल समारोह समिति एवं नगर स्तरीय लैङ्गिक हिंसा निगरानी सञ्जाल नेपालगन्ज उपमहानगरपालिकाका संयोजक केशब कोइरालाको अध्यक्षतामा भएको कार्यक्रममा बोल्ने वक्ताहरूले महिला अधिकार स्थापित गर्नका लागि सामुहिक एकता र अभियानको खाचो रहेकोमा जोड दिएका थिए । उनिहरुले महिलाहरूले निर्वाह गरिरहेको दायित्वलाई अर्थपुर्ण रूपमा लिनुपर्ने धारणा राखेका थिए ।
कार्यक्रमा प्रमुख अतिथि तथा लुम्बिनी प्रदेशका सांसद मिना श्रेष्ठले अहिले पनि महिला हिंसाका घटना घटिरहेको हुँदा सबै सचेत दिदीबहिनीहरूले प्रभावकारी भूमिका निभाउनुपर्ने बताउनुभयो । महिला अधिकारका लागि आफूले पनि निरन्तर सङ्घर्ष गरिरहेको बताउँदै उहाले महिलाका नाममा निकाशा हुने बजेटमा चासो दिन पनि आग्रह गर्नुभयो ।
कार्यक्रममा जिल्ला प्रहरी कार्यालय बाँकेका प्रहरी उपरिक्षक तुलबहादुर कार्कीले महिला अधिकारका विषयमा प्रकाश पार्दे ट्राफिक नियमको पनि पालना गर्नुपर्ने धारणा राख्नुभएको थियो । कार्यक्रममा राष्ट्रिय मानव अधिकार आयोग नेपालगन्जमा प्रमुख द्वारिक अधिकारीले महिला आन्दोलनले स्थापित भएको महिला अधिकारलाई अब व्यावहारिक बनाउन जरुरी रहेको बताउनुभयो ।
कार्यक्रममा नेपाल पत्रकार महासङ्घ बाँकेका अध्यक्ष नविन गिरीले महिलाहरूको हकहितका लागि सञ्चार क्षेत्रबाट निरन्तर भूमिका निर्वाह भइरहेको र आगामि दिनमा पनि निरन्तर लागि पर्ने प्रतिबद्धता व्यक्त गर्नुभयो । कार्यक्रममा नेपालगन्ज उपमहानगरपालिका न्यायिक समितिका सदस्य रुमिता श्रेष्ठ र नेपालगन्ज उपमहानगरपालिका कार्यपालिका सदस्य संगिता रेग्मी लगायतले बोल्नुभएको थियो। कार्यक्रममा २ सय भन्दा धेरैको सहभागिता रहेकोे थियो ।
दिवसको पूर्वसन्ध्यामा नेपालगन्जमा अन्य कार्यक्रमहरू पनि भएका थिए । जसअन्तर्गत दिवसको अवसरमा नगरस्तरीय बालक्लब सन्जालका पदाधिकारीलाई ३ दिने स्थानीय बालमैत्री कार्यक्रम सम्बन्धी तालिम सञ्चालन गरिएको थियो ।
ग्रामिण क्षेत्रमा महिला पुरुष समविकास तालिम ३ दिने सञ्चालन र कृपा हस्पिटल र सामुदायिक प्रहरी सेवा व्यवस्थापन केन्द्रको आयोजनामा कृपा हस्पिटलमा विपन्न अवस्थाका महिलाहरूको निःशुल्क पाठेघरको क्यान्सर परिक्षण कार्यक्रम गरिएको नेपालगन्ज उपमहानगरपालिका महिला बालबालिका तथा जेष्ठ नागरिक शाखाका प्रमुख पवित्राकुमारी पुरीले बताउनुभयो ।
