राजु लामिछाने
रुकुम पश्चिम, साउन १ गते । रुकुम पश्चिममा गए राती आएको बाढीले घर बगाउँदा मृत्यु भएका तीन बालिकाको शव निकालिएको छ । आठबिसकोट नगरपालिका-१२ को झिन्चौर बगरमा तातोपानी र झिन्चौर खोलाको बाढीले घर बगाउँदा घरमै पुरिएर मृत्यु भएका तीन बालिकाको शव निकालिएको हो ।
भूकम्पपछि बनाइएको उक्त अस्थायी टहरामा सुतेका ती बालिकालाई गिजागार र तातोपानी खोलाबाट आएको बाढीले बगाउँदा मृत्यु भएको जिल्ला प्रहरी कार्यालयका सूचना अधिकारी प्रहरी निरीक्षक बखत बहादुर शाहीले जानकारि दिनुभयाे ।
यस्तै, नगर प्रमुख रबी केसीका अनुसार बाढीले घर बगाउँदा पुरिएर मृत्यु भएका १० वर्षीया हितमाया पुन, आठ वर्षीया धनसा पुन र चार वर्षीया मनीषा सार्कीको शव निकालिएको हो ।
बाढीले घर बगाउँदा बेपत्ता हुनुभएका स्थानीय ४० वर्षीया डिल्लीबहादुर बुढाथोकीको खोजी कार्य भइरहेको नगरप्रमुख केसीले जनाउनुभयो । उहाँ बसेको घरमै परिएको हुनसक्ने आशङ्का गरिएको छ । लेदोसहितको बाढीले घर पुरिएको छ । डोजर लगाएर लेदो हटाउने तयारी भइरहेको छ ।
घटनामा परेर घाइते भएका सात जनाको भने आठबिसकोटस्थित नगर अस्पतालमा उपचार भइरहेको छ । स्थानीय १२ वर्षीया विनय सार्की, २२ वर्षीया मनीषा पुन, २९ वर्षीया जनक खत्री, ६ वर्षिया मनसरी पुन, चार वर्षीया मेक्सन पुन, २८ वर्षीया धनमाया पुन र ६५ वर्षीया कल्पना कामी घाइते हुनुभएको छ ।
आठबिसकोटको वडा नम्बर १०, ११ हुँदै आउने गिजागार खोलामा आएको बाढीले घर बगाउँदा उक्त घटना भएको बताइएको छ । बाढीले अन्य स्थानका घर र घट्ट बगाएको छ । घटनाको पूर्ण विवरण सङ्कलन हुँदै गरेको नगरप्रमुख केसीले बताउनुभयो ।
