कैलालीका ५२ मतदानस्थल अति संवेदशनशील

अविनाश चौधरी
धनगढी, वैशाख १४ गते। कैलालीमा रहेको २३६ मतदान स्थलमध्ये ५२  मतदानस्थल अति संवेदनशील रहेको जिल्ला प्रशासन कार्यालयले जानकारी दिएको छ। 

५३ वटा मतदानस्थललाई संवेशदनशील र बाँकी १३१ मतदानस्थल सामान्य रहेको प्रशासनले जनाएको छ। भौगोलिक विकटता, जनसङ्ख्याको चाप र विगतमा भएका गतिविधिलाई आधार मानेर मतदानस्थलको वर्गीकरण गरिएको प्रमुख जिल्ला अधिकारी किरण थापाले जानकारी दिनुभयो। 

उहाँले मतदानस्थल, मतपेटिकाको सुरक्षाको लागि सुरक्षा योजना बनाइएको बताउनुभयो। ‘विकट पहाडी क्षेत्रबाट हेलिकोप्टरमार्फत् मतपेटिका ढुवानी हुनेछ’, उहाँले भन्नुभयो। 

२३६ मतदानस्थल र ६१९ मतदान केन्द्र रहेको कैलालीमा निर्वाचन सम्पन्न गर्नका लागि चार हजारभन्दा बढी कर्मचारी आवश्यक पर्ने जनाइएको छ। जिल्लामा निर्वाचनका लागि शिक्षकसहित छ हजारभन्दा बढी जनशक्ति खटाइएको छ। 

यसैबीच, निर्वाचन सुरक्षाका लागि तयारी गरिएको छ। स्थानीय तहको निर्वाचन सुरक्षा रणनीति अनुसार निर्वाचन सुरक्षाका लागि सुरक्षाकर्मी खटाउने तयारी छ। 

५२ मतदानस्थल अति संवेदनशील रहेको कैलालीमा रणनीति अनुसार सुरक्षाकर्मी खटाइने प्रमुख जिल्ला अधिकारी थापाले बताउनुभयो। ‘तीन घेरामा निर्वाचनको सुरक्षा हुन्छ’, उहाँले भन्नुभयो, ‘पहिलो घेरामा नेपाल प्रहरी, दोस्रो घेरामा एपीएफ र बाह्य घेरामा नेपाल आर्मी रहन्छ। रेस्क्यु फोर्स, स्ट्याग, मोबाइ टोली, हवाई गस्ती रहनेछ।’ 

समस्या भएमा हेलिकप्टरमार्फत सुरक्षाकर्मी पुर्याउने तयारी भएको छ।