गोरखापत्र अनलाइन
पेशागत महासङ्घ २८ औँ वर्षमा प्रवेश
गोरखापत्र अनलाइनकाठमाडौँ, जेठ ६ गते । औपचारिक र अनौपचारिक क्षेत्रमा क्रियाशील पेशाकर्मीहरुको छाता सङ्गठन नेपाल पेशागत महासङ्घ (कोनेप) स्थापनाको २८ औँ वर्षमा प्रवेश गरेको छ । महासङ्घको केन्द्रीय कार्यालय थापाथलीमा आज आयोजित अठ्ठाइसौँ स्थापना दिवस तथा शुभकामना आदानप्रदान कार्यक्रममा महासङ्घका संयोजक एवं नेकपा (एमाले) का केन्द्रीय सदस्य बाबुराम थापाले पेशागत मर्यादा, स्वाभिमान र सुरक्षाका लागि सङ्घर्षशील हुँदै ट्रेड युनियन अधिकार र बौद्धिक श्रमिकका हितका सवालमा बुलन्द आवाज उठाउनुपर्नेमा जोड दिनुभयो । महासङ्घका सल्लाहकार कुलबहादुर आचार्यले पेशागत हक, हित र सुरक्षाका सवालमा एकताबद्ध भएर लाग्न शुभकामना दिनुभयो । महासङ्घका सचिव डा.ऋषिकेश पन्थीका अनुसार महासङ्घमा हाल २९ आबद्ध घटक (राष्ट्रिय सङ्घ), ४३ प्रतिष्ठान कमिटी र छ लाख ३० हजार साधारण सदस्य छन् । महासङ्घमा निजामति कर्मचारी, शिक्षक, वित्तीय कर्मचारी, स्थानीय तह तथा स्वास्य क्षेत्रका कर्मचारी, विश्वविद्यालयका कर्मचारी, इञ्जिनीयरिङ पेशाकर्मी, सामुदायिक क्याम्पसका प्राध्यापक, सार्वजनिक संस्थाका कर्मचारीलगायत आबद्ध छन् ।ट्रेड युनियन अधिकार र हितको प्राप्ति तथा संरक्षण गर्दै पेशागत सङ्घ—सङ्गठनमा आवद्ध शक्तिलाई एकापसमा समायोजन तथा सबलीकरण गरी राष्ट्रको सेवामा समर्पित भई पेशागत दक्षता वृद्धिका लागि विसं. २०५२ जेठ ५ गते सो महासङ्घको स्थापना भएको थियो । शुरुमा पेशागत ऐक्यबद्धता मञ्च नेपालको नामबाट स्थापित सो संस्थाको २०५३ जेठ ४ र ५ गतेको राष्ट्रिय भेलाबाट महासङ्घमा परिणत भएको हो ।
खोलामा डुबेर एक जनाको मृत्यू
रेखीराम रानापाल्पा, जेठ ५ गते । तिनाउ खोलामा डुबेर एक जना पुरुषको मृत्यु भएको छ । बिहीबार दिउँशो ३ बजेतिर तिनाउ गाउँपालिका–३, स्थित तिनाउ खोलामा फोटो खिच्दै पौडी खेल्ने क्रममा डुबेर रुपन्देही जिल्ला सिद्धार्थनगर नगरपालिका–१० का ३६ वर्षीय कयम अलीको मृत्यु भएको हो । साथीहरूसँगै पौडी खेल्ने क्रममा अचानक खोलामा बेपत्ता भएका अलीलाई प्रहरीको सहायताबाट खोजतलास गरेर भेटिएपछि उपचारका लागि लुम्विनी प्रादेशिक अस्पताल बुटवलमा लगिएको थियो । अस्पतालका चिकित्सकले अलीको मृत्यु भएको घोषणा गरेको जिल्ला प्रहरी कार्यालय पाल्पाले जनाएको छ । घटनाको बारेमा थप अनुसन्धान कार्य भइरहेको जिल्ला प्रहरी कार्यालय पाल्पाका प्रहरी नायव उपरीक्षक वीरेन्द्र थापाले जानकारी दिनुभयो ।
रामधुनी नगरपालिकामा एमालेका उम्मेदवार विजयी
जयकृष्ण यादव इनरुवा, जेठ ५ गते । सनुसरीको रामधुनी नगरपालिकाको प्रमुखमा शंकरलाल चौधरी निर्वाचित हुनुभएको छ । स्थानीय तह निर्वाचनको मतपरिणामअनुसार एमालेका उम्मेदबार रामधुनी नगरपालिकाको प्रमुखमा शंकरलाल चौधरी र उपप्रमुख तारा थापा निर्वाचित हुनुभएको हो ।चौधरीले १३ हजार ७७२ मतसहित विजयी हुनुभयो । उहाँका निकटतम प्रतिस्पर्धी नेपाली काँग्रेसका सुदिप अधिकारीले ११ हजार ४३५ मत ल्याई पराजित हुनुभयो । उपप्रमुखमा एमालेकै थापाले १२ हजार १२८ मतसहित विजयी हुनुभयो । काँग्रेसका उम्मेदबारले १० हजार ४९३ मत ल्याई पराजीत हुनुभयो । रामधुनी नगरपालिकाको वडा नम्बर १, ५, ६ को वडा अध्यक्षमा काँग्रेस र वडा नम्बर २, ३, ७ र ८ को वडा अध्यक्षमा एमाले र वडा नम्बर ९ को वडा अध्यक्षमा नेकपा एसका उम्मेदबार चिर्वाचित हुनुभएको छ ।
सुरूङगा नगरपालिका प्रमुखमा चौधरी विजयी
ललिता साहवोदेवर्साइन (सप्तरी), जेठ ५ गते । सप्तरीमा पहिलोपटक नगरपालिका प्रमुखमा महिला उम्मेदवार विजयी हुनुभएको छ । स्थानीय तह निर्वाचन अन्तर्गत विहीवार आएको परिणामअनुसार सुरूङगा नगरपालिका प्रमुखमा नेपाली काँग्रेसकी गीता चौधरीले जित हात पार्नुभएको हो । चौधरी सात हजार दुई सय ९२ मत ल्याउँदा एकीकृत समाजवादीका रामनारायण चौधरीले चार हजार, एक सय १७ र जनता समाजवादीका साबीर अलीले तीन हजार छ सय ६८ मत मात्र ल्याउनुभयो । नगर उपप्रमुखमा नेकपा एमालेका सलीमकुमारी पासवान, माओवादी केन्द्रका शिवकुमार राम र एकीकृत समाजवादीका सुनिताकुमारी मुखियालाई हराउँदै कांग्रेसका रुद्रबहादुर कार्की निर्वाचित हुनुभयो । कार्कीले ६ हजार दुई सय ७५ मत ल्याउँदा एमालेकी पासवानले दुई हजार एक सय तीन, माओवादी केन्द्रका रामले दुई हजार चार सय ६७ र एकीकृत समाजवादीकी सुनीता कुमारी मुखियाले तीन हजार नौ सय ९८ मत ल्याउनुभयो । योसँगै सप्तरीको इतिहासमा पहिलो महिला प्रमुख चौधरी पहिलो बन्नुभएको छ ।
वीरेन्द्रनगरको प्रमुख र उपप्रमुख दुवैमा एमालेका उम्मेदवार विजयी
मुना हमालसुर्खेत, जेठ ५ गते । वीरेन्द्रनगर नगरपालिकाको प्रमुख र उपप्रमुख दुवैमा एमालेका उम्मेदवार विजयी हुनुभएको छ । नेपाली काँग्रेस र नेकपा माओवादी केन्द्रको गठबन्धनलाई हराउँदै एमालेका उम्मेदवार विजयी हुनुभएको हो । नगर प्रमुखमा एमालेका मोहनमाया ढकाल (भण्डारी) र उपप्रमुखमा निलकण्ठ खनाल विजयी हुनुभएको छ । प्रमुखमा ढकालले १६ हजार ३८ मत ल्याउँदा उहाँका निकटतम प्रतिद्वन्द्वी काँग्रेसका उपेन्द्रबहादुर खड्काले १५ हजार ४८४ मत ल्याएर पराजित हुनुभयो । मुख्य निर्वाचन अधिकृतको कार्यालयका अनुसार उपप्रमुखमा निलकण्ठ खनालले २० हजार ३६४ मत ल्याएर विजयी हुनुभयो । उहाँका निकटतम प्रतिद्वन्द्वी माओवादी केन्द्रकी शान्ति ढकालले ११ हजार ५३३ मत ल्याएर पराजित हुनुभयो । एमालेले यस पटक वीरेन्द्रनगरमा काँग्रेसको गढ भत्काउँदै विजयी हासिल गरेको छ । एमालेले अघिल्लो निर्वाचनमा प्रमुखमा हारेको थियो । प्रमुख ढकाल अघिल्लो निर्वाचनमा उपप्रमुखमा निर्वाचित हुनुभएको थियो । यसपटक उहाँलाई एमालेले प्रमुखको उम्मेदवार बनाएको थियो । यसपटक गठबन्धनलाई हराउँदै नगरको १६ वडामध्ये ११ वटा वडासहित प्रमुख र उपप्रमुखमा एमालेले जितेको छ । काँग्रेसले पाँच वटा वडा जितेको छ । मुख्य निर्वाचन अधिकृतको कार्यालयका अनुसार वडा नं २ मा एमालेबाट गजबहादुर बुढा, वडा ३ मा विनोदसिंह विष्ट, वडा नं ४ मा शेरबहादुर के सी, वडा नं ५ मा लोकवहादुर शाही विजयी हुनुभएको छ । यस्तै, एमालेबाट वडा नं ८ मा टीकाराम शर्मा, वडा नं ९ मा ऋषि गिरी, वडा नं १० मा डिलबहादुर रखाल, वडा नं ११ मा खिमलाल देवकोटा, वडा नं १२ मा चुडामणि चपाई, वडा नं १४ मा देवबहादुर रोकाय र वडा नं १६ मा डण्डबहादुर विश्वकर्मा विजयी हुनुभएको छ । सोहीअनुसार वडा नं १ मा काँग्रेसका दिनेश खत्री, वडा नं ६ मा जनकबहादुर रावल, वडा नं ७ मा ध्रुव कुमार चपाई, वडा नं १३ मा दीपेन्द्रराज कोइराला र वडा नं १५ मा कृष्णबहादुर थापा विजयी हुनुभएको छ ।
सिरानचोक गाउँपालिकाको अध्यक्षमा गुरुङ, उपाध्यक्षमा देवकोटा
नरेन्द्र ढकालगोरखा, जेठ ५ गते । सिरानचोक गाउँपालिकामा पुनः नेपाली कांगे्रस बिजयी भएको छ । अध्यक्षका उम्मेदवार ज्ञानेन्द्र गुरुङ ४ हजार ६३० मतका बिजयी बन्नुभएको हो । उहाँका निकतम् प्रतिस्पर्धी नेकपा माओवादी केन्द्रका नवराज पुडासैनीले ३ हजार ५३५ मत ल्याउनुभयो । पुडासैनीलाई १ हजार ९५ को फराकिलो मतान्तर हराउँदै गुरुङ बिजयी बन्नुभएको सिरानचोक गाउँपालिका निर्वाचन अधिकृत डोलनाथ न्यौपानेले जानकारी दिनुभयो । वडा २ थालाजुङका निवर्तमान वडाध्यक्ष रहनुभएका गुरुङ लोकप्रिय मत ल्याएर बिजयी बन्नुभयो । ४१ वर्षे युवा गुरुङ यसअघिका वडा अध्यक्षमध्येबाट अध्यक्ष, प्रमुखमा टिकट पाउने एकमात्र व्यक्ति हुनुहुन्छ । स्नात्तोतर गर्नु भएका उहाँ राम्रा योजनाकार समेत मानिनुहुन्छ । नेकपा (एमाले) बाट अध्यक्षका प्रत्यासी देबराज श्रेष्ठले १ हजार ५४५ मत ल्याउनु भएको छ । यसैगरी जनता समाजवादी पार्टीका चित्रबहादुर गुरुङले ४८६, राष्ट्रिय प्रजातन्त्र पार्टीका जयप्रकाश बगालेले १२८, मंगोल नेशनल अर्गनाइजेसनका यमबहादुर गुरुङ, ८९ र राष्ट्रिय नागरिक पार्टीका सन्तबहादुर बिश्वकर्माले १० मत पाउनुभयो । त्यसैगरी उपप्रमुखमा पनि कांग्रेसका उम्मेदवार रीता देबकोटा बिजयी हुनुभएको छ । ४ हजार १ सय ४ मत ल्याएर उहाँ बिजयी हुनुभयो । उहाँका निकटम् प्रतिस्पर्धी माओवादी केन्द्रकी उम्मेदवार पूर्णकुमारी ढकालले ३ हजार २ सय ४६ मत ल्याएर पराजित हुनुभयो । यसअघि पनि उपाध्यक्ष रहनु भएकी उहाँ दोस्रो कार्यकालका लागि निर्वाचित हुनभयो । एमालेकी शशिकला देवकोटाले १ हजार ८४४, जनता समाजवादी पार्टीकी शोभा सुनारले ६५२, मंगोल नेशनल अर्गनाइजेसनकी पञ्चमायाँ गुरुङले १७५, राष्ट्रिय प्रजातन्त्र पार्टीकी सीता पोखरेलले १४४ र राष्ट्रिय नागरिक पार्टीकी दिपमायाँ बिकले २५ मत ल्याउनुभयो । ८ वटा वडामा रहेको सिरानचोक गाउँपालिकामा वडा नं. १, २, ३, ४, ८ गरी ५ वटा वडामा कांग्रेस बिजयी भएको छ । वडा ५, ६, ७ मा माओवादी केन्द्रले जित हासिल गरेको निर्वाचन अधिकृतको कार्यालयले जनाएको छ ।
पाँचसय सत्तरी स्थानीय तहको परिणाम सार्वजनिक
गोरखापत्र अनलाइनकाठमाडौं, जेठ ५ गते । गत वैशाख ३० गते सम्पन्न स्थानीय तह सदस्य निर्वाचनको आजसम्म ५७० स्थानीय तहको निर्वाचन परिणाम आएको छ । निर्वाचन आयोगका प्रवक्ता तथा सहसचिव शालिग्राम शर्मा पौडेलले आज आयोगमा आयोजित नियमित पत्रकार सम्मेलनमा सो जानकारी गराउनुभएको हो ।प्रवक्ता पौडेलका अनुसार हालसम्म प्रमुखमा १७४, उपप्रमुखमा १७४, अध्यक्षमा ३९६, उपाध्यक्षमा ३९६, वडाध्यक्षमा ५ हजार ६५९, महिला सदस्यमा ५ हजार ६५३, दलित महिला सदस्य ५ हजार ५५६ र वडा सदस्यमा ११ हजार २९५ गरी कूल २९ हजार ३०३ जना उम्मेदवार निर्वाचित भइसकेका छन् । कुल ३५ हजार २२१ मध्ये अहिलेसम्म आएको परिणाम ८० प्रतिशत रहेको प्रवक्ता पौडेलले बताउनुभयो । देशभरका ७५३ पालिकामध्ये दाङको तुल्सीपुर उपमहानगरपालिका वडा १७ र कपिलवस्तुको महाराजगञ्ज नगरपालिकाबाहेक देशभरका सबै मतदान केन्द्रमा मतदान कार्य सञ्चालन भएको प्रवक्ता पौडेलले बताउनुभयो । स्थगन भएका स्थानमध्ये ५ स्थानमा जेठ १ गते, ७ स्थानमा जेठ २ गते, ८ स्थानमा जेठ ३ गते र १५ स्थानमा जेठ ४ गते मतदान कार्य सम्पन्न भइसकेको आयोगले जनाएको छ । यसैगरी अछामको साँफेबगरमा जेठ ६ गते पुनः मतदान हुने कार्यक्रम रहेको प्रवक्ता पौडेलले जानकारी गराउनुभयो । यस्तै, उदयपुरको त्रियुगा नगरपालिका वडा १२ र बाजुराको बुढीगंगा नगरपालिकाको सम्बन्धमा आयोगबाट निर्णय हुन बाँकी रहेको छ । जेठ ५ गतेलाई स्थानीय तहका जनप्रतिनिधिहरुको पदमा बहाल रहने अन्तिम मिति मानेर सो मितिसम्ममा वैशाख ३० मा सम्पन्न भएको मतदानको गणना कार्य सक्नेगरी निर्वाचन आयोगले सम्बन्धित निर्वाचन अधिकृतहरुलाई यसअघि नै आवश्यक निर्देशन दिइसकेको छ ।जेठ ५ गतेसम्ममा सम्पूर्ण स्थानीय तहमा मतगणना कार्य सम्पन्न हुन नसकेको हुँदा यथासक्य छिटो, बढीभन्दा बढी मत गणना टोली परिचालन गरी गणना कार्य सम्पन्न गर्न र गत वैशाख ३० गते मतदान स्थगित भई पुनः मतदान भएका मतदान केन्द्रको हकमा मतपेटिका प्राप्त भएको बढीमा ४ दिनभित्र मत गणना कार्य सम्पन्न हुने विश्वास आयोगले गरेको छ ।नेपालको संविधानको धारा २१५ उपधारा (४) मा गाउँसभाको निर्वाचनको अन्तिम परिणाम प्राप्त भएको मितिले पन्ध्र दिनभित्र गाउँसभाका सदस्यहरुले आफूमध्येबाट निर्वाचित गरेका चार जना महिला सदस्य र उपधारा (५) बमोजिमको योग्यता भएका दलित वा अल्पसंख्यक समुदायबाट गाउँसभाले निर्वाचित गरेका दुई जना सदस्य हुने व्यवस्था छ ।त्यस्तै, धारा २१६ को उपधारा (४) बमोजिम नगरसभाको निर्वाचनको अन्तिम परिणाम प्राप्त भएको पन्ध्र दिनभित्र नगरसभाका सदस्यहरुले आफूमध्येबाट निर्वाचित गरेका पाँच जना महिला सदस्य र उपधारा (५) बमोजिमको योग्यता भएका दलित वा अल्पसंङ्ख्यक समुदायबाट नगरसभाले निर्वाचित गरेका तीन जना सदस्य समेत नगर कार्यपालिकाको सदस्य हुने व्यवस्था रहेको भन्दै आयोगले स्मरण गराएको छ ।त्यसैगरी, निर्वाचित जनप्रतिनिधिहरुमध्ये गाउँपालिकाको अध्यक्ष, नगरपालिकाको प्रमुख र जिल्ला समन्वय समितिको प्रमुखले आफ्नो कार्यभार सम्हाल्नु अगावै निर्वाचित भएको सात दिनभित्र स्थानीय सरकार सञ्चालन ऐन, २०७४ ले तोकेको ढाँचामा सम्बन्धित जिल्ला न्यायाधीशसमक्ष पद तथा गोपनियताको शपथ लिनुपर्ने व्यवस्था छ ।सोहीअनुसार गाउँपालिकाको उपाध्यक्ष, नगरपालिकाको उपप्रमुख, वडाअध्यक्ष, गाउँ तथा नगरसभाका सदस्य र जिल्ला समन्वय समितिका उपप्रमुख र सदस्यले अध्यक्ष वा प्रमुखले शपथ लिएको सात दिनभित्र तोकिएको ढाँचामा पद तथा गोपनियताको शपथ लिनुपर्ने व्यवस्था रहेकाले सोहीअनुसार गर्न गराउन आयोगले सम्बन्धित सबैमा स्मरण गराएको छ । आयोगले निर्वाचन प्रक्रियामा स्थानीय तह निर्वाचन निर्देशिका, २०७८ तथा स्थानीय तह निर्वाचन (मतदान) निर्देशिका, २०७८ र स्थानीय तह निर्वाचन (मतगणना) निर्देशिका, २०७८ को व्यवस्थाको प्रतिकूल हुनेगरी कार्य गर्ने कर्मचारीको विवरण पठाउने मुख्य निर्वाचन अधिकृत तथा निर्वाचन अधिकृतलाई निर्देशन दिएको छ । त्यस्तै, आयोगले स्थानीय तह सदस्य निर्वाचनको सिलसिलामा देशका विभिन्न मतदानस्थलका मतदान केन्द्रमा भएका कानूनविपरीत गतिविधिमा संलग्नलाई कारवाही गर्न निर्देशन दिएको छ । त्यस्ता गतिविधिमा संलग्नलाई तत्काल पक्राउ गरी निर्वाचन (कसूर तथा सजाय) ऐन, २०७३ बमोजिम कारवाही गर्न नेपाल सरकार, गृह मन्त्रालयमार्फत ७७ जिल्लाका सबै जिल्ला प्रहरी कार्यालयलाई निर्देशन दिने र सोको जानकारी प्रहरी प्रधान कार्यालयलाई दिने आयोगले निर्णय गरेको प्रवक्ता पौडेलले बताउनुभयो ।
कपिलवस्तुको यशोधरा गाउँपालिकामा एमालेका उम्मेदवार विजयी
नारद कोहारतौलिहवा, जेठ ५ गते । कपिलवस्तुको यशोधरा गाउँपालिकाको अध्यक्षमा नेकपा (एमाले) का उम्मेदवार शिवदायल तिवारी निर्वाचित हुनुभएको छ । तिवारीले नेपाली काँग्रेसका उम्मेदवार अनुपकुमार पाण्डेयलाई १ हजार २६२ मतले पछि पार्दै अध्यक्षमा विजयी हुनुभएको हो । विजयी तिवारीले ४ हजार ४ सय ६२ मत प्राप्त गर्दा उहाँका निकटतम प्रतिस्पर्धी काँग्रेसका पाण्डेयले ३ हजार २ सय मत प्राप्त गर्नुभयो । त्यस्तै, गाउँपालिकाको उपाध्यक्षमा एमालेकै गुन्जादेवी मौर्या निर्वाचित हुनुभएको छ । मौर्याले काँग्रेस उम्मेदवार बिन्द्रावती यादवलाई ८ सय ८ मतले हराउँदै विजयी हुनुभएको हो । उपाध्यक्षमा निर्वाचित मौर्याले ४ हजार ४५ मत ल्याउनुभयो । उहाँका निकटतम प्रतिस्पर्धी कांग्रेसकी यादवले ३ हजार २३७ मत प्राप्त गर्नुभयो । एमालेले गाउँपालिका अध्यक्ष र उपाध्यक्षसहित वडा नं. १, २ र ८ गरी तीनवटा वडा जितेको छ । त्यस्तै कांग्रेसले वडा नं. ३ र ७ गरी दुर्ई वटा वडा, जनता समाजवादीले एक, जनमत पार्टीले एक र स्वतन्त्र उम्मेदवारले एक वडाध्यक्ष जितेका छन् । गाउँपालिकामा आठ वटा वडा छ । २०७४ को निर्वाचनमा यशोधरा गाउँपालिका काँग्रेसले जितेको थियो ।
स्याङ्जाको नगरमा काँग्रेस, गाउँमा एमालेको दबदबा
स्थानीय तह निर्वाचन २०७९ मा स्याङ्जामा रहेका सबै ११ वटा स्थानीय तहको नतिजा सार्वजनिक भएको छ । पाँच नगरपालिका र ६ गाउँपालिकामध्ये चार नगरपालिका र एक गाउँपालिकामा नेपाली काँग्रेस तथा एक नगरपालिका र पाँच गाउँपालिकामा नेकपा (एमाले) का उम्मेदवार विजयी भएका छन् ।
गुल्मीमा काँग्रेस ५, माओवादी ४ र एमालेलाई ३ प्रमुख
तिलाचन पाण्डेतम्घास, जेठ ५ गते । वैशाख ३० गते सम्पन्न स्थानीय तहको निर्वाचनबाट गुल्मीका २ स्थानीय तहमा पुरानै अनुहार निर्वाचित हुनुभएको छ । जिल्लाको धुर्कोट गाउँपालिका र कालीगण्डकी गाउँपालिकाका अध्यक्षहरु पुनःनिर्वाचित हुनुभएको हो । धुर्कोट गाउँपालिकामा नेकपा (माओवादी केन्द्र) का भुपाल पोखरेल र कालीगण्डकी गाउँपालिकामा नेपाली कांग्रेसका बेदबहादुर थापा दोस्रो कार्यकालका लागि निर्वाचित हुनुभएको छ । पोखरेलले काँग्रेसका महेन्द्र भण्डारीलाई एक हजार ८२८ मतले पराजित गर्नुभएको हो । थापाले नेकपा (एमाले) का रामजी ढकाललाई १३३ मतले पराजित गर्नुभयो । यस्तै, जिल्लाको मदाने गाउँपालिकामा एमालेकी सरीता खड्का पुनः उपाध्यक्ष पदमा निर्वाचित हुनुभएको छ । उहाँले माओवादी केन्द्रका बेगम चन्दलाई पराजित गर्दै दोस्रो कार्यकालका लागि निर्वाचित हुनुभएको हो । खडकाले चन्दलाई ३५६ मतले पराजित गर्नुभयो । गुल्मीको १२ स्थानीय तहमध्ये ५ स्थानीय तहमा काँग्रेस, ४ तहमा माओवादी केन्द्र र ३ स्थानीय तहमा एमालेले प्रमुख पदमा विजयी हासिल गरेको छ ।
काँग्रेस सभापति शाही सवार गाडी दुर्घटना, तीन जना घाइते
हरिकृष्ण ऐडी मुगु, जेठ ४ गते । काँग्रेस पार्टी मुगुका जिल्ला सभापति ऐनबहादुर शाही सवारी दुर्घटनामा पर्नुभएको छ । सोरु गाउँपालिका ६ बन्जाहा भन्ने स्थानमा शाही सवार गाडी दुर्घटनामा परेको प्रहरी नायव उपरीक्षक सुवास हमालले जानकारी दिनुभयो ।उहाँकाअनुसार सभापति ऐनबहादुर शाही, कुबेरजंङ शाही र नरबिर शाही सवार गाडी दुर्घटना हुदा घाइते हुनुभएको छ । उहाँहरुलाई माउन्टेन हेलिकप्टरबाट बाँकेको कोहलपुरस्थित मेडिकल कलेजमा उपचारका लागि लगिएको छ प्रहरी नायब उपरीक्षकले जानकारी गराउनुभयो । उहाँहरु जिल्लाको सदरमुकाम गमगढीदेखि सोरु गाउँपालिकाको सदरमुकाम सोरुकोटमा जाँदैगर्दा सोरुको बन्जाहा भन्ने ठाँउमा आज गाडी दुर्घटना भएको थियो । जिल्ला सभापति शाही सवार गाडी लु १ ज १७७२ नम्बरको भएको प्रहरीले जनाएको छ ।
सन्धिखर्क नगरपालिकामा एमालेका मेयर उपमेयर विजयी
गणेश खनालअर्घाखाँची, जेठ ४ गते । सन्धिखर्क नगरपालिकाको मेयर र उपमेयर पदमा नेकपा (एमाले) का उम्मेदवार कृष्णप्रसाद श्रेष्ठ र मिश्रा आचार्यको बिजयी हुनुभएको छ । गठबन्धनका तर्फबाट काग्रेसका मेयर पदकी उम्मेदवार शान्ता भण्डारी र उपमेयरमा गठबन्धन तर्फबाट नेकपा (माओवादी केन्द्र) का राजेन्द्र भुसाल पराजित हुनुभयो । ६ स्थानीय तह रहेको जिल्लामा मालारानी गाउँपालिकामा एमालेका उम्मेदवार दलबहादुर भट्टराई, उपाध्यक्षमा दिपा प्रोखरेल, छत्रदेव गाउँपालिकामा काग्रेसका चन्द्रमान श्रेष्ठ, एमालेबाट मनि पन्थि विजयी हुनुभएको छ । त्यस्तै, छत्रदेव गाउँपालिकामा एमालेका टेकराज गैरे अध्यक्ष, उपाध्यक्षमा नर्मदा पौडेल, भुमिकास्थान नगरपालिका जनमोर्चाका झविलाल थापा र उपमेयरमा माओवादीका बालकृष्ण बजान्डे विजयी हुनुभएको छ । सितगंगा नगरपालिकामा मतगणना जारी रहेको छ ।
खैरहनी नगरपालिकामा मेयर काँग्रेस, उपमेयरमा एमाले विजयी
शालिग्राम नेपाल चितवन, जेठ ४ गते । चितवनको खैरहनी नगरपालिकामा गठवन्धनबाट नेपाली काँग्रेसका उम्मेदवार शशीकुमार खनिया निर्वाचित हुनुभएको छ । उहाँले नेकपा (एमाले) का उम्मेदवार लालमणि चौधरीलाई ८५० मतले पराजित गर्दै निर्वाचित हुनुभएको हो । खनियाले १४ हजार ५४५ मत प्राप्त गर्नुभएको छ । उहाँका निकटतम प्रतिष्पर्धी चौधरीले १३ हजार ६९५ मत प्राप्त गर्नुभयो । नगरपालिकाको उपमेयरमा एमालेका उम्मेदवार कविता उप्रेती विजयी हुनुभएको छ । उप्रेतीले १४ हजार १६४ मत प्राप्त गरी विजयी हुनुभयो । उहाँको निकटतम प्रतिष्पर्धी गठवन्धनबाट माओवादी केन्द्रका उपमेयरका उम्मेदवार लक्ष्मी ढकाल ९ हजार ६७० मत प्राप्त गर्नुभयो । खैरहनी नगरपालिका वडा १ मा काँग्रेसका नवराज भुसाल, वडा २ मा काँग्रेसका रोहीणीप्रसाद उप्रेती, वडा ३ मा काँग्रेसकै पूर्णवहादुर गुरुङ, वडा ४ मा एमालेका वेदवहादुर अधिकारी, वडा ५ मा एमालेका छत्रनाथ सुेवेदी निर्वाचित हुनुभयो ।त्यस्तै, वडा ६ मा एमालेका कमलप्रसाद न्यौपाने, वडा ७ मा एमालेका मनेजर महतो, वडा ८ मा काँग्रेसका शंकर कँडेल, वडा ९ मा एमालेका वन्धुराम महतो, वडा १० मा काँग्रेसका चन्द्रविक्रम चौधरी, वडा ११ मा एमालेका दीपेन्द्रकुमार दरै, वडा १२ मा काँग्रेसका केदारनाथ पन्त र वडा १३ मा एमालेका कुलप्रसाद भुसाल निर्वाचित हुनुभयो । यसअघि खैरहनी नगरपालिकाको मेयरमा एमालेका लालमणि चौधरी, उपमेयरमा एमालेकै सुनिता थपलिया निर्वाचित हुनुभएको थियो ।
इच्छाकामना गाउँपालिकामा एमालेका उम्मेदवार निर्वाचित
शालिग्राम नेपाल चितवन, जेठ ४ गते । चितवनको एक मात्र इच्छाकामना गाउँपालिकाको अध्यक्षमा एमालेका उम्मेदवार दानबहादुर गुरुङ र उपाध्यक्षमा एमालेकै माया सिलवाल निर्वाचित हुनु भएको छ । चण्डीभन्ज्याङका स्थायी बासिन्दा गुरुङले नेपाली कांग्रेसकी अध्यक्ष उम्मेदवार गीताकुमारी गुरुङलाई फराकिलो मत अन्तरले पछाडि पार्दै विजयी हुनुभएको हो ।एमालेका दानबहादुरले छ हजार ११० मत ल्याउँदा कांग्रेसकी गीताकुमारीले चार हजार ६०८ मत ल्याउनुभयो । वुधबार वडा नम्बर ७ को मतगणना सकिएसँगै विजय घोषणा गरिएको छ ।सरकारी विद्यालयको प्रधानाध्यापक बनेका दानबहादुर पेन्सन पाक्न चार वर्ष मात्रै बाँकी रहँदा स्थायी जागिर छाडेर चुनावी मैदानमा उत्रनु भएको हो । एमाले निकट शिक्षक संगठन चितवनको निवर्तमान जिल्ला अध्यक्षसमेत रहनुभएका गुरुङ सो क्षेत्रमा निकै लोकप्रिय नेताका रुपमा चिनिनुहुन्छ । अध्यक्षका प्रतिस्पर्धी गीताकुमारी पनि शिक्षा क्षेत्रबाट नै राजनीतिमा आउनु भएको हो । त्यसैगरी उपाध्यक्षमा एमालेकी माया सिलवालले पाँच हजार ३४४ मत प्राप्त गर्दै विजयी हुनुभयो । मुग्लिनकी स्थायी बासिन्दा उहाँले माओवादी केन्द्रका प्रताप गुरुङलाई ३०० मतले पछााडि पार्दै निर्वाचित हुनुभयो । प्रतापले पाँच हजार ४४ मत ल्याउनुभयो । यसअघि २०७४ सालमा कांग्रेसले विजय हासिल गरेको इच्छाकामनामा अहिले एमालेले राम्रो मत ल्याएको हो । गाउँपालिकाको वडा १ को अध्यक्षमा माओवादी वडा २, ३, ४ र ५, ६ मा एमाले विजयी भएको छ । वडा नम्बर ७ मा कांग्रेसले विजय हासिल गरेको छ ।
भेरी र बारेकोटमा एमाले, छेडागाडमा काँग्रेस बिजयी
वासुदेव शर्मा जाजरकोट, जेठ ४ गते । जाजरकोटको भेरी नगरपालिकमा दोस्रो कार्यकालका लागि पुनः नेकपा (एमाले) का चन्द्रप्रकाश घर्ती निर्वाचित हुनुभएको छ । छेडागाड नगरपालिका प्रमुखमा गठबन्धनबाट नेपाली काँग्रेसका रत्नबहादुर खडका विजयी हुनुभएको छ ।त्यस्तै, बारेकोट अध्यक्षमा एमालेबाट बीरबहादुर गिरि निर्वाचित हुनुभएको छ । सत्ता गठबन्धनका उम्मेदवार गगनबहादुर खडकालाई फराकिलो मतान्तरले पराजित गर्दै उहाँ बिजयी हुनुभएको हो । अन्तिम मतगणनाको परिणामअनुसार एमालेका चन्द्रप्रकाश घर्तीले पाँच हजार २१० मत ल्याएर बिजयी हुनु भएको छ । उहाँका निकटतम प्रतिद्धन्दी माओवादी केन्द्रका गगनबहादुर खडकाले चार हजार १८८ मत प्राप्त गर्नुभएको छ । घर्तीले खडकालाई १ हजार २२ मतको अन्तरले पराजित गर्नुभयो । २०७४ सालको स्थानीय तह निर्वाचनमा काग्रेसलाई पराजित गर्दै उहाँ बिजयी हुनुभएको थियो । नगरप्रमुख र उपप्रमुख दुवै एमालेले जितेको थियो । यसपाली उपप्रमुखमा सत्ता गठबन्धनबाट काग्रेसकी सीता गौतम ६ हजार ४६८ मतका साथ बिजयी हुनुभयो । उहाँका निकटतम प्रतिद्धन्दी एमालेकी साबित्रि चन्दले पाँच हजार ६०३ मत प्राप्त गर्नुभयो । यस्तै, छेडागाड नगरपालिकाको प्रमुखमा गठबन्धनको तर्फबाट काग्रेसका रत्नबहादुर खडका बिजयी हुनुभएको छ । उहाँले एमालेका लालबहादुर महतारालाई पराजित गर्दै नगरप्रमुखमा बिजयी हुनुभएको हो । खडकाले आठ हजार ६०५ मत प्राप्त गरी जिय हुनुभयो । उहाँका निकटतम प्रतिद्धन्दी एमालेका महताराले चार हजार ९१८ मत प्राप्त गर्नुभयो । महताराले २०७४ को स्थानिय तह निर्वाचनमा खडकालाई पराजित गर्दै नगर प्रमुखमा विजय हुनु भएको थियो । उपप्रमुखमा सत्ता गठबन्धनकै चन्द्रबहादुर थापा निर्वाचित हुनुभयो । थापा सात हजार ४६१ मत ल्याएर विजय हुनुभयो । उहाँका निकटतम प्रतिद्धन्दी एमालेकी अन्जु थापाले पाँच हजार ४३६ मत प्राप्त गर्नुभयो । १३ वडा रहेको छेडागाडमा काग्रेसले ४, माओबादी केन्द्रले ४, एमालेले ४, समाजवादीले १ वडामा बिजयी बनेको छ । बारेकोटमा एमालेका बीरबहादुर गिरी बिजयी हुनुभएको छ । काग्रेसका निर्बतमान अध्यक्ष महेन्द्रबहादुर शाहलाई एक सय ९ मतले पराजित गर्दै गिरी बिजयी हुनुभएको हो ।गिरीले तीन हजार ९५४ मत प्राप्त गरी बिजयी हुनुभयो । उहाँका निकटतम प्रतिद्धन्द्धी काग्रेसका शाहले तीन हजार ८४५ मत प्राप्त गर्नुभयो । उपाध्यक्षमा माओवादी केन्द्रका नरबहादुर गिरी बिजयी हुनुभयो । गठबन्धनका उपाध्यक्षका उमेदवार गिरीले तीन हजार ६६३ मत प्राप्त गर्नुभयो । उहाँका निकटतम प्रतिद्धन्दी एमालेकी गीता सिहले तीन हजार ४०१ मत प्राप्त गर्नुभयो । भेरीमा एक उपप्रमुखसहित काग्रेस ७, माओबादी केन्द्र ४, एमालेले २ वटा वडा अध्यक्ष जितेको छ ।
