नारद कोहार
तौलिहवा, (कपिलवस्तु) फागुन ३ गते । कपिलवस्तुको शिवराज नगरपालिका १ सुरही खोलामा बस खस्दा १० जनाको घटनास्थलमै मृत्यु भएको छ भने २० जना घाइते भएका छन् । सुरही खोलामा ०२–००१ख–००९८ न. को सुनौलो महाकाली यातायातको यात्रुवाहक बस दुर्घटना भएको हो ।
सशस्त्र प्रहरी बल नेपाल नं. २८ गण कपिलवस्तुमा सशस्त्र प्रहरी उपरीक्षक जीवन केसीका अनुसार महेन्द्रनगरबाट काठमाडौंतर्फ जाँदै गरेको यात्रुवाहक बस सडकबाट दुई सय फिट तल खसेको छ । घाइतेलाई बुटवल र भालुवाङतर्फ पठाइएको जानकारी उहाँले दिनुभयो ।
घटनास्थलमा सशस्त्र प्रहरी उपरीक्षक केसीसहित ६० जनाको टोलीद्वारा उद्धार कार्य भइरहेको छ । घटनाको थप विवरण आउन बाँकी छ ।
