पाकिस्तान निर्वाचन : खान निकट स्वतन्त्र उम्मेदवारको समूहलाई अग्रता

इस्लामावाद, माघ २६ गते । पाकिस्तानमा बिहीबार सम्पन्न निर्वाचनमा इमरान खानको पार्टी पाकिस्तान तेहरिक–ए–इन्साफ (पीटीआई)ले प्रारम्भिक मतगणनाका क्रममा १५० सिटमा अग्रता लिएको दाबी गरेको छ ।

पीटीआईका अध्यक्ष ब्यारिस्टर गोहरको एक्स (ट्वीटर) अकाउन्टमा शेयर गरेको एक भिडियोमा पूर्व प्रधानमन्त्री खानले पीटीआईले १५० मतको अग्रता लिएको उल्लेख गरिएको छ ।

यद्यपि, एएफपीका अनुसार शुक्रबार बिहानसम्म सार्वजनिक १३ स्थानको नतिजामा खान निकट स्वतन्त्र उम्मेदवारले पाँच र पूर्व प्रधानमन्त्री नवाज सरिफ निकट पाकिस्तान मुश्लिम लीग–नवाज (पीएमएल–एन) ले चार स्थानमा जीत हासिल गरेका छन् ।

मत गणनासँगै थप उर्जावान बनेका खानले भिडियोमा पञ्जाब, खैबर पख्तुनख्वालगायत सम्पूर्ण पाकिस्तानमा पीटीआईको नेतृत्वमा सरकार बनाउने दाबी गर्नुभएको छ ।

खानको आधिकारिक एक्स अकाउन्ट भनिने पीटीआईका अध्यक्ष ब्यारिस्टर गोहरको नामबाट खोलिएको एक्स अकाउन्टमा एक भिडियोमा लेखिएको छ, “इन्शअल्लाह पीटीआईले पञ्जाब, केपी र सङ्घीय क्षेत्रमा सरकार बनाउनेछ । रातारात परिणाम परिवर्तन गर्ने कुनै पनि प्रयासलाई पाकिस्तानका जनता वा स्थानीय र अन्तर्राष्ट्रिय पर्यवेक्षक र मिडियाले कुनै पनि हालतमा विफल पार्नेछन् र स्वीकार गर्ने छैनन् ।”

भिडियोमा भनिएको छ, “पीटीआईले २०२४ को चुनावलाई पूर्ण बहुमतले जितेको छ । संसारले यसको साक्षी बनायो । अब परिणामको हेरफेरले पूर्ण अराजकता र अस्थिरताबाहेक अरू केही हासिल गर्दैन । जनताले निर्णय गरेका छन् ! उनीहरूको निर्णयको सम्मान गरौँ ।”

यसबिच पीटीआईका महासचिव ओमार अयुब खानले भन्नुभएको छ, “व्यापक धाँधली भइरहेको छ र यो पूर्णतया असम्भव छ ।”

उहाँले निर्वाचन व्यवस्थापन प्रणालीको विश्वसनीयता र ‘पर्दा पछाडिको प्रणालीलाई नियन्त्रण गर्ने अरू कोही’ को बारेमा उहाँको आशङ्काको बारेमा चेतावनी दिँदै भन्नुभएको छ, “मैले पहिले पनि ‘आरओ’हरूलाई चुनावपछि केही पनि धाँधली नगर्न भनेको थिएँ, तर उनीहरूले त्यही गरिरहेको देखिन्छ । आरओ एनए १९७ का शब्दहरूले राष्ट्रलाई पिरोल्न पुगेको देखिन्छ ।

उहाँले थप्नुभयो, “पूर्णतया अस्वीकार्य !! पीटीआईले करिब दुई करोड ५० लाखदेखि तीन करोडसम्म भोट पाएको छ । पाकिस्तानका जनता र देशले यस्ता ‘धँदला काल (२०१८ देखि २०२३ सम्म’ को अवधि) पीडादायी घटनालाई थप सहन सक्दैन ।”

यसैबीच, पीएमएल–एनकी नेतृ मरियम औरङजेबले पञ्जाब प्रान्तमा पीएमएल–एनले जितेको दाबी गर्नुभएको छ । उहाँले भन्नुभयो, “पाकिस्तान मुस्लिम लिग ९एन० ले सङ्घ र पञ्जाबमा सरकार बनाउनेछ र सार्वजनिक सेवाको नयाँ युग सुरु हुनेछ ।”

औरङजेबल अगाडि भन्नुभयो, “पार्टीको निर्वाचन समितिको नतिजा आउने क्रम जारी छ । मोबाइल र इन्टरनेट सेवा उपलब्ध नहुँदा नतिजा प्राप्त गर्न कठिन भएको छ । मुस्लिम लिग (एन) को स्थिति मजबूत छ ।”

उहाँले अल्लाहको कृपाले पाकिस्तान मुस्लिम लिग (एन) ले जनताको सेवा गर्ने र उनीहरूलाई उनीहरूको समस्याबाट सदा झैं मुक्त गर्ने आफ्नो गम्भीर प्रतिबद्धता पूरा हुने बताउनुभएको छ ।

खानको दल पीटीआईले नतिजा सार्वजनिक गर्न ढिलाइ भएपछि नतिजामा व्यापक धाँधली भएको आरोप लगाए पनि पाकिस्तानको गृह मन्त्रालयले भने नतिजाको प्रक्रियामा ढिलाइ भइरहेको चिन्ताको पुनरावलोकन गरिएको जनाएको छ । मन्त्रालयले ढिलाइलाई निर्वाचन सुरक्षाका लागि अपनाइएको ‘सञ्चारमा नियन्त्रण’ को कारण बताएको छ ।

यसैबीच निर्वाचन आयोगले निर्वाचन नतिजा सार्वजनिक गर्न ढिलाइ भएको स्वीकार गर्दै विविध प्राविधिक कारणले नतिजा घोषणामा ढिलाइ भएको तर सन्तोषप्रद नै रहेको भन्दै आगामी नतिजा कुनै अवरोधविना सहजरूपमा आउने विश्वास व्यक्त गरेको छ । रासस/एएफपी