हाम्रो सम्बन्ध रगतले बाँधिएको छ : बङ्गलादेशका विदेश मन्त्री महमुद

नयाँदिल्ली, माघ २५ गते । हाल भारतको आधिकारिक भ्रमणमा रहेका बङ्गलादेशका विदेश मन्त्री हसन महमुदले भारत नजिकको छिमेकी भएको उल्लेख गर्दे आफूहरूको सम्बन्ध रगतले बाँधिएको बताउनुभएको छ ।

एएनआईसँग कुरा गर्दै विदेशमन्त्री महमुदले भारत बङ्गलादेशको छिमेकी मात्र नभई बङ्गलादेशको स्वतन्त्रता युद्धमा पनि महत्त्वपूर्ण सहयोगी भूमिका खेलेको कुरामा जोड दिनु भएको छ ।

महमुदले बङ्गलादेशकी प्रधानमन्त्री शेख हसिनाले चुनाव पछि भारत भ्रमण गर्ने बताउँदै भारत–बङ्गलादेशका समस्याको विस्तृत शृङ्खला रहेको बताउनुभयो । बङ्गलादेशको स्वतन्त्रता र स्वाधीनता प्राप्तिको आन्दोलनमा भारतीय जनता तथा सेनाले आफ्नो रगत बगाएकाले दुई राष्ट्रबिचको सम्बन्ध रगतले बाँधिएको  बताउनुभएको छ । 

आफ्ना भारतीय समकक्षी जयशङ्करसँगको भेटमा बङ्गलादेशका विदेशमन्त्रीले सीमापार मुद्दा, शक्ति साझेदारी, समन्वयलगायतका सबै मुद्दामा छलफल गरेको  एएनआईलाई बताउनुभयो ।

यसअघि, बङ्गलादेशका विदेश मन्त्री महमूदले आफ्नो भारत भ्रमणले दुई देशबिचको सम्बन्धलाई बलियो बनाउन योगदान पुर्‍याउने बताउनुभएको थियो ।

एएनआईसँग कुरा गर्दै महमुदले बङ्गलादेश र भारत दुई भाइचारा देशबिच राम्रो सम्बन्ध रहेको बताउनुभयो । बङ्गलादेश वा भारतीय मन्त्रीको बङ्गलादेशको कुनै पनि भ्रमणले द्विपक्षीय सम्बन्धलाई बलियो बनाउने उहाँको भनाइ रहेको छ ।  

विदेश मन्त्री महमुदले राष्ट्रिय सुरक्षा सल्लाहकार अजित डोभालसँग पनि भेटवार्ता गर्नुभएको थियो । दुई नेताहरूले सुरक्षा सुनिश्चित गरी बाहिरी स्थिरतासमेत कायम गर्न क्षेत्रीय सहयोग बढाउनका लागि मार्ग खोज्न छलफल भएको छ ।

प्रधानमन्त्रीका रूपमा लगातार चौथो कार्यकाल सुरक्षित गर्दै शेख हसिनाको ऐतिहासिक विजय प्राप्त गरेपछि बङ्गलादेशको नयाँ सरकारमा शपथ लिएपछि महमुदको यो पहिलो विदेश भ्रमण हो । रासस/एएनआई