दिनेशलाई ‘एनपीजीए म्याच प्ले’ गल्फ उपाधि

काठमाडौँ, पुस १४ गते । सूर्य नेपाल ‘एनपीजीए म्याच प्ले’ गल्फ प्रतियोगिताको उपाधि दिनेश प्रजापतिले जित्नुभएको छ । गल्फ टुर २०२३/२४ अन्तर्गत रोयल नेपाल गल्फ क्लबमा भएको सिजनको दोस्रो प्रतियोगितामा दिनेशले ३६ होलको फाइनलमा जयराम श्रेष्ठलाई ६/४ ले हराउनुभयो ।

दिनेशको यो खेल जीवनको दोस्रो उपाधि हो । साबिक विजेता समेत रहनुभएका दिनेशले उपाधिसहित ६० हजार रुपियाँ पुरस्कार पाउनुभयो । उपविजेता जयरामले ४२ हजार रुपियाँ पाउनुभयो । तेस्रो हुनुभएका रामे थापाले ३२ हजार रुपियाँ पाउनुभयो ।