काठमाडौं, कात्तिक १३ गते । प्रहरीले जुवातास खेलिरहेको अवस्थामा विभिन्न स्थानबाट २३ जना पक्राउ गरेको छ ।
नेपाल प्रहरी प्रधान कार्यालयले सोमबार प्रेस विज्ञप्ति जारी गर्दै भक्तपुरको मध्यपुर ठिमी नगरपालिका – ३ कौशलटारस्थित इन्द्रबहादुर श्रेष्ठको टहरामा जुवातास खेलिरहेको अवस्थामा सिन्धुली गोलन्जाेर गाउँपालिका स्थायी घर भई हाल भक्तपुर बस्ने ५६ वर्षीय कुमार बरालसहित १५ जनालाई पक्राउ गरेको जानकारी दिएको छ ।
विशेष सूचनाको आधारमा जिल्ला प्रहरी परिसर भक्तपुरबाट खटिएको प्रहरी टोलीले उनीहरुलाई एक लाख चार हजार ६५० रुपियाँ र १४ बुक ताससहित पक्राउ गरेको प्रहरीले जनाएको छ ।
यसैगरी, कन्चनपुरको भिमदत्त नगरपालिका – ७ हल्दुखालस्थित खोला किनारमा जुवातास खेलिरहेको अवस्थामा ४० वर्षीय पारस भट्टसहित आठ जनालाई प्रहरीले पक्राउ गरेको छ ।
जिल्ला प्रहरी कार्यालय कन्चनपुरबाट खटिएका प्रहरीले उनीहरुलाई एक लाख १४ हजार ११० रुपियाँ र तास एक गड्डीसहित पक्राउ गरेको हो ।
उक्त स्थानबाट मोटरसाइकल ६ थान र स्कुटर एक थानसमेत बरामद गरिएको र दुवै घटनाको सम्बन्धमा आवश्यक अनुसन्धान भइरहेको प्रहरीले जनाएको छ ।
