लस एन्जलस, मङ्सिर २७ गते । अमेरिकी रोग नियन्त्रण तथा रोकथाम केन्द्रका पछिल्लो अनुमानअनुसार, हाल मौसमी फ्लुका कारण संयुक्त राज्य अमेरिकामा करिब २९ लाख व्यक्ति सङ्क्रमित भएका छन्, जसमा तीस हजार जना अस्पताल भर्ना भएका छन् भने एक हजार दुई सय जनाको मृत्यु भएको छ ।
केन्द्रका अनुसार मौसमी इन्फ्लुएन्जा देशका अधिकांश भागमा बढ्दो क्रममा छ र यस सिजनमा इन्फ्लुएन्जा ए (एच३एन२) प्रमुख भाइरसको रूपमा फैलिरहेको छ । छ डिसेम्बरसम्मको हप्तामा अमेरिकी सार्वजनिक स्वास्थ्य प्रयोगशालाले राष्ट्रव्यापीरूपमा पाँच सय सत्तालिस इन्फ्लुएन्जा भाइरस पत्ता लगाएका छन् ।
यसै हप्तामा यस सिजनको पहिलो बालबालिका मृत्युसँग सम्बन्धित फ्लुको रिपोर्ट पनि आएको छ । केन्द्रले विशेष गरी छ महिनाभन्दा माथिका व्यक्तिलाई, वार्षिक फ्लु खोप लगाउन सिफारिस गरेको छ । त्यसै गरी, केन्द्रका अनुसार, फ्लु उपचारका लागि केही औषधी उपलब्ध छन् । यी औषधी समयमै सुरु गर्दा सबैभन्दा प्रभावकारी हुन्छन् र विशेष गरी ती व्यक्तिका लागि महत्त्वपूर्ण छन्, जसलाई गम्भीर फ्लु-सम्बन्धित जटिलता हुने जोखिम बढी हुन्छ । रासस/सिन्ह्वा
-original-thumb.jpg)
