काठमाडौं, असोज २३ गते ।
परराष्ट्रमन्त्री नारायण प्रकाश साउद र इजरायलका विदेश मामिला मन्त्री एली कोहेनबीच आज सम्पर्क टेलिफोन वार्ता भएको छ ।
हमासले गरेको आक्रमणपछि त्यहाँ ठूलो मानवीय तथा भौतिक क्षति भएको छ । सोही घटनामा १० नेपालीको निधन भएको छ । वार्तामा त्यहाँ रहेका नेपालीको उद्धार र निधन भएका नेपालीको शव नेपाल ल्याउने विषयमा पनि कुराकानी भएको छ ।
नेपालीहरुलाई सुरक्षित स्थानमा स्थानान्तरण गर्न र स्वदेश फर्कन चाहने नेपालीहरुलाई सहजीकरण गर्ने विषयमा कुराकानी गर्नुभयो । ईजरायली सरकारका परराष्ट्रमन्त्रीले पूर्ण सहयोगको प्रतिबद्धता व्यक्त गर्नुभएको छ ।
परराष्ट्र मन्त्रालयले यस कठिन समयमा नेपालको इजरायलसँग ऐक्यबद्धता रहेको जनाएको छ ।
यसअघि परराष्ट्रमन्त्री साउदले आजै प्रतिनिधिसभाको अन्तर्राष्ट्रिय सम्बन्ध र पर्यटन समितिमा इजरायलमा निधन भएका नेपालीको शव यथाशीघ्र स्वदेश ल्याउन, घाइतेहरुको उपचार गर्न, सम्पर्कविहीन भएकाको तत्काल खोजी गर्न गरिएको प्रयासबारेमा जानकारी दिनु भएको थियो ।
ईजरायलमा निधन भएका १० जना नेपालीहरुको शव नेपाल ल्याउनका लागि इजरायल सरकारका विधिविज्ञान निकायसँग समन्वय भई सकेसम्म चाँडो ल्याउने गरी कार्यप्रक्रिया शुरु भइसकेको छ ।
ईजरायल र गाजाको सीमा क्षेत्रमा बंकरभित्र आश्रय लिई बसेका सुदूरपश्चिम विश्वविद्यालयका ३२ जना र कृषि तथा वन विज्ञान विश्वविद्यालयका २३ जना गरी ५५ जना विद्यार्थीहरुलाई सुरक्षित स्थानमा स्थानान्तरण भइसकेको छ। ईजरायलको उत्तरी सिमानामा अध्ययनरत विद्यार्थीहरुलाई समेत सुरक्षित स्थानमा सार्ने काम भइरहेको छ । सम्पर्कविहीन अवस्थामा रहेका बिपिन जोशीको खोजीकार्य तीव्र रुपमा भइरहेको छ ।
उद्दार हुन तथा नेपाल फर्कन चाहने ३२४ जना नेपाली नागरिकहरुले राजदूतावासको अनलाइन रजिष्ट्रेशन प्रणालीमार्फत विवरण उपलब्ध गराएका छन् ।
विवरण दिनेमध्ये २८८ जनाले नेपाल फर्कन र ३६ जनाले स्थानान्तरण हुन चाहेको बताएका छन् ।
हालको अवस्थामा अध्ययन तथा अन्य प्रयोजनका लागि ईजरायल जान लाग्नु भएका नेपालीहरुलाई तत्काल भ्रमण नगर्न परराष्ट्र मन्त्रालयले हार्दिक अनुरोध गरेको छ ।
