काठमाडौँ, असोज १९ गते । नेपाल कृषि अनुसन्धान परिषद (नार्क) र कृषि तथा वन विश्वविद्यालय (एएफयु) का पदाधिकारीबिच कृषि अनुसन्धान र शिक्षाका विषयमा सहकार्य गर्ने सहमति भएको छ ।
अध्ययन तथा शिक्षाको क्षेत्रमा एकअर्कालाई कसरी सहयोग गर्ने, त्यसको मापदण्ड, प्रक्रियालगायतको विषयमा विस्तृत छलफल गर्न दुवै पक्षबाट तीन–तीन जना रहने गरी कार्यदल गठन गरेको छ । कार्यदलले अध्ययन गरेर १५ दिनभित्र आफ्नो प्रतिवेदन बुझाउने सहमति भएको नार्कका कार्यकारी निर्देशक डा. ध्रुवराज भट्टराईले जानकारी दिनुभयो ।
कृषि अनुसन्धान र शिक्षाका लागि कसरी पाठ्यक्रम बनाउने र कृषिमा भएको अनुसन्धानलाई किसानसमक्ष कसरी पु¥याउनेलगायतका विषयमा छलफल भएको उहाँले बताउनुभयो । नार्कका वैज्ञानिकले विश्वविद्यालयमा पढाउने, त्यहाँका विद्यार्थीले अनुसन्धानमा सघाउनेलगायतका विषयमा छलफल भएका छन् ।
चितवनको रामपुरमा नार्कको फार्म र विश्वविद्यालय एकै ठाउँमा रहेका छन् । एकै ठाउँमा रहेका कारण एकअर्कालाई सघाउने काम भइरहेको छ । कृषि तथा वन विश्वविद्यालयमा पढ्ने विद्यार्थी नार्कको फार्ममा गएर अनुसन्धान गरिरहेका हुन्छन्, नार्कका वैज्ञानिकहरूले विश्वविद्यालयमा पनि सहयोग पु¥याइरहेका हुन्छन् ।
त्यहाँ विद्यार्थी र नार्कका वैज्ञानिकबिच समन्वय भइरहेको देखिन्छ । त्यसले दुवै संस्थालाई फाइदा भइरहेको उहाँले जानकारी दिनुभयो । यो व्यावहारिक मात्र भइरहेको हो, यसलाई संस्थागत गर्नका लागि नै यो सहकार्य हुन लागेको कार्यकारी निर्देशक भट्टराईले बताउनुभयो ।
दुवै पक्षबिच रामपुरमा मात्र होइन, देशैभर शिक्षा र अनुसन्धानमा कसरी सहयोग गर्न सकिन्छ, त्यसबारेमा कार्यदलले अध्ययन गरेर प्रतिवेदन बुझाएपछि अगाडि बढ्ने सहमति भएको नार्कले जनाएको छ । खुमलटारस्थित नार्कमा बुधबार भएको छलफलमा विश्वविद्यालयका तर्फबाट उपकुलपति प्राडा पुण्यप्रसाद रेग्मी र अनुसन्धान तथा प्रसार निर्देशनालयका निर्देशक डा. ऋषिराम कट्टेल तथा नार्कका तर्फबाट कार्यकारी निर्देशक भट्टराई, बाली तथा बागवानी निर्देशक डा. टीकाबहादुर कार्की, योजना तथा समन्वय निर्देशक डा. लुमानिधि पाण्डेलगायतको उपस्थिति थियो ।
