मोरङ, असोज १२ गते । विश्व मुटु दिवसका उपलक्ष्यमा आज बिहान विराटनगरमा आयोजित सचेतनामूलक प्रभातफेरीमा कोशी प्रदेशका मुख्यमन्त्री हिक्मतकुमार कार्की सहभागी हुनुभयो ।
नोबेल शिक्षण अस्पतालले महेन्द्रचोकबाट तीनपैनी चोकसम्म आयोजना गरेको प्रभातफेरीमा उहाँ पनि सहभागी हुनुभएको हो ।
यसैगरी स्थानीय जेलनमार्क औषधि उद्योगले विराटनगरस्थित कोशी अस्पतालबाट निकालेको प्रभातफेरीले नगरको मुख्य–मुख्य भाग परिक्रमा गर्दै तीनपैनी चोकमा आयोजित कोणसभामा परिणत भयो ।
कोणसभामा कोशी अस्पतालका चिकित्सक डा. दीपक सिग्देल, नोबेल अस्पतालका वरिष्ठ मुटुरोग विशेषज्ञ डा. राजेश नेपाल र औषधि उद्योगका प्रतिनिधि निरज कर्णले धूमपान त्यागी दैनिक व्यायाम गर्दा र स्वच्छ खानपानले मुटरोग लाग्नबाट बच्न सकिने बताउनुभयो ।
उहाँहरूले विश्व मुटु महासङ्घको प्रतिवेदनअनुसार सन् २०१९ मा मृत्यु हुनेमध्ये ८५ प्रतिशतको मृत्यु दृदयाघात र स्ट्रोकका कारण भएकाले समयमै आफ्नो मुटु जाँच गरी औषधि सेवन गरेमा अकाल मृत्युबाट जोगिन सकिने विचार व्यक्त गर्नुभयो ।
प्रभातफेरीमा कोशी र नोबेल अस्पतालका चिकित्सक, चिकित्साशास्त्रमा अध्ययनरत विद्यार्थी एवं सर्वसाधारणको सहभागिता थियो । रासस
