सहारा घरलाई आर्थिक सहयोग

घोडाघोडी समाचारदाता

घोडाघोडी (कैलाली), असोज ११ गते । कैलाली बर्दगोरिया गाउँपालिका–२ स्थित सहयोगी हातहरू नेपाल संस्थाले सञ्चालन गरेको सहारा घरलाई एक करोड ५० लाख रुपियाँ सहयोग प्रदान गरिएको छ । 

सहारा घरलाई व्यवस्थित रूपमा सञ्चालन गर्न राष्ट्रिय योजना आयोगले उक्त सहयोग प्रदान गरेको हो । सो संस्थाले सडकमा अलपत्र परेका, मानसिक रोगी, बेसहारा तथा असाहय नागरिकलाई सहारा दिँदै आएको छ । 

स्थानीय बलबहादुर विष्टले २०७० सालदेखि सञ्चालनमा ल्याउनुभएको सहारा घरमा मानसिक रोगी तथा असाह्य बालबालिका गरी एक सय जनाभन्दा बढीले आश्रय पाइरहेका छन् । देश/विदेशबाट उपलब्ध  व्यक्ति तथा सङ्घ संस्थाको सहयोगबाट सहारा घर सञ्चालन हुँदै आएको छ । 

सरकारले पहिलो पटक यति ठुलो सहयोग गरेपछि साच्चै नै राम्रो काम गरेको अनुभूति भएको सहाराका सञ्चालक विष्टले बताउनुभयो । समाज सेवामा अहोरात्र खटिएका विष्टले सडकमा अलपत्र परेका नागरिकको अभिभावकीय जिम्मा सम्हाल्दै आउनुभएको छ । 

सरकारले लिनुपर्ने जिम्मेवारी आफूले लिँदाको खुसीसँगै सरकारको साथले उत्साह थपेको उहाँले बताउनुभयो । बर्दगोरिया गाउँपालिकाको सिफारिसमा सहारा घरका लागि यत्तिको रकमसहितको योजना परेको हो ।

बर्दगोरिया गाउँपालिकाका प्रमुख प्रशासकीय अधिकृत अर्जुनसिंह कार्कीले सहारा घरले राम्रो काम गरेको बताउँदै दीर्घकालीन व्यवस्थापनका लागि योजना आयोगबाट अनुदान परेको बताउनुभयो । भौतिक पूर्वाधार निर्माणका लागि छुट्याइएको सो योजना कार्यान्वयनका लागि ठेक्का प्रक्रियामा गइसकेको छ । 

उहाँले एक महिनाभित्र ठेक्का सम्झौता गरी निर्माण योजनाको काम सुरु गरिने उहाँले बताउनुभयो । विशेष अनुदान अन्तर्गत बहुवर्षीय योजना परेको जानकारी दिँदै प्रमुख कार्कीले राष्ट्रिय माध्यमिक विद्यालय कोटा तुलसीपुर र मोहन्याल माध्यमिक विद्यालय बाँस्कोटीलाई पनि एक करोड ८० लाख अनुदान प्राप्त भएको जानकारी दिनुभयो ।

उक्त तीन वटै योजनाको एकै पटक टेन्डर आह्वान गरेर निर्माण प्रक्रिया अगाडि बढेको जनाइएको छ । सीमित स्रोत साधनमा खुम्चिएर सेवा दिइरहेको सहारा घर अब व्यवस्थित र सुविधायुक्त हुने अपेक्षा गरिएको छ । 

सहारा घरमा पाँच जनाले स्वयम्सेवकका रूपमा सहयोग गरिरहेका छन् । उहाँहरूले सहारा घरमा आश्रितहरूलाई खाना बनाउने, सरसफाइ गर्ने, हेरचाहमा सहयोग गरिरहेको सहारा घरका सञ्चालक विष्टले बताउनुभयो ।

सहारा घरको मानवीय सेवाबाट प्रभावित भएर देश/विदेशमा रहेका नेपालीले जन्मदिन, विवाह, उत्सवमा खर्च गर्ने रकम बचाएर सहारा घरलाई दिने गरेका छन् । सहयोगबाट नै अहिलेसम्म सहारा घरमा आउने असहाय, दुःखी, पीडितलाई खाने बस्ने व्यवस्था भएकोे सञ्चालक विष्टले बताउनुभयो ।