माओवादीकाे रुपान्तरण अभियान : विपन्नलाई घर

जानु पाण्डे

कपिलवस्तु, असोज ३ गते । नेकपा माओवादी केन्द्रको तीनमहिने रुपान्तरण अभियान अन्तर्गत श्रमदान गरी विपन्नको घर निर्माण गरिएको छ । कपिलवस्तुको शिवराज नगरपालिका ९ रमुवादहमा ढिकरु थारुको घर निर्माण गरिएको हो । 

विपन्न र सुस्त मनस्थिति रहेका थारु दम्पती बस्दै आएको घरको निर्माणको लागि श्रमशिविर सञ्चालन गरिएको पार्टी शिवराज नगर अध्यक्ष चिन्ता परियारले बताउनुभयो । उहाँको घरको भित्ता भ्वाङ परेको र टिनको छानो चुहिने अवस्थामा रहेको थियो । यस बाहेक पनि अभियान अन्तर्गत टोलटोलमा सामाजिक विकासका काम गर्ने बताइएको छ । 

पार्टीको अभियानसँगै जनताको पीरमर्का र समस्यालाई समाधान गर्न जनतासँगै काम गर्नुका लागि कार्यकर्तालाई निर्देशन दिएको जिल्ला संयोजक विष्णु बेल्वासेले बताउनुभयो। अभियानका क्रममा सरसफाइ, वृक्षरोपण, सिँचाइका नाला, पानीका मुहान आसपास सरसफाइ, योग शिविर जस्ता कार्यक्रम गर्ने योजना गरिएको छ ।