फडिन्द्र अधिकारी
लेखनाथ, साउन ३ गते । १३औँ दक्षिण एसियाली खेलकुदमा नयाँ खेल थपियो । थपिएको नयाँ खेल थियो, बिच भलिबल । समुद्री किनारमा खेलिने बिच भलिबल भूपरिवेष्टित नेपालमा कहाँ खेलाउने भन्ने केही समय दुबिधै रह्यो । पछि फेवाताल किनारमा रहेको एउटा कोर्ट र थप नयाँ तीन कोर्ट बनाएर प्रतियोगिता सम्पन्न गरियो ।
त्यसबेला बिच भलिबल कोर्ट बनाउन राष्ट्रिय खेलकुद परिषद्ले ६० लाख रुपियाँ खर्च गरेको थियो । सो प्रतियोगितापछि एक, दुई वटा थप प्रतियोगिता त्यहाँ भए । अहिले परबाट हेर्दा कोर्टको नामोनिशान नै देखिँदैन । नेपाल ट्रष्टमातहत रहेको यो जग्गामा अहिले काँडेतार लगाइएको छ । कोर्ट क्षेत्र अहिले झाडी बनेको छ ।
परिषद्ले नेपाल ट्रस्टसँग मौखिक सहमति गरी कोर्ट बनाएको सदस्य राजेश गुरुङ बताउनुहुन्छ । । उहाँ भन्नुहुन्छ, ‘‘अहिले चौर बनेको छ । ट्रस्टसँग बसेर संरक्षणका लागि केही गर्ने सल्लाह भएको छ ।’’ ६० लाख लगानी भए पनि नेपाल ट्रस्टसँग लिखित सम्झौता नै नगरी कोर्ट बनाइएको थियो । राखेप सदस्य गुरुङले त्यो बेला अस्थायी रूपमा कोर्ट बनाएर प्रतियोगिता गरिएको जनाउँदै अब राखेमार्फत नेपाल ट्रस्टसँग संरक्षणका लागि विशेष पहल गर्ने उल्लेख गर्नुभयो ।
समुद्रको आभास दिने ताल किनार र हिमालसमेत छलंङ देखिने ठाउँमा रहेको कोर्ट जोगाउन सके खेलकुदको विकाससँगै पर्यटन प्रवर्द्धनमा समेत सहयोग पुग्ने भलिबल सङ्घ कास्कीका तत्कालीन अध्यक्ष भीम पराजुली बताउनुहुन्छ ।
‘‘विदेशबाट बिच भलिबल खेल्नकै लागि केही खेलाडी आएका थिए । नेपालमै पनि बिच भलिबलको सम्भावना खोज्न सकिन्छ,’’ उहाँ भन्नुहुन्छ, ‘यसलाई जोगाउन सके खेलकुदसँगै पर्यटनमा टेवा पुग्छ । फेरि अर्को बिच भलिबल कोर्ट बनाउन पनि तत्काल सम्भव देखिँदैन । स्वामित्व जसको भए पनि राज्यकै सम्पत्ति भएकाले यसको संरक्षण गर्नुपर्ने बताउनुहुन्छ ।’’
यहाँको कोर्ट २०७६ मङ्सिरमा बनाइएको हो । ताल किनारमा बनाइएको बिच भलिबल कोर्ट सरोकारवालाको बेवास्ताका कारण घाँसे मैदान बनेको हो । गण्डकी प्रदेश खेलकुद परिषद् सदस्य सचिव श्रीधर शर्माले बिच भलिबल कोर्टको संरक्षण गर्नु प्रदेशको पनि दायित्व भएकाले आवश्यक पहल गरिने बताउनुहुन्छ ।
यता, नेपाल ट्रष्टकी सूचना अधिकारी सरस्वती पौडेल खनालले कोर्ट बनाएर छोटो समयका लागि जग्गा उपलब्ध गराइएको बताउनुभयो । उहाँ भन्नुहुन्छ, ‘‘त्यो त अस्थायी रूपमा बनेको संरचना हो नि । हाम्रो छोटो समयका लागि जग्गा भाडामा दिने कार्यविधि छ, त्यही अन्तर्गत दिएका थियौँ ।’’
