गोकर्ण दयाल
बैतडी, असार ३१ गते । नेपाल–भारत समन्वय बैठकमा भारतीय अधिकारीले धारचुलामा खानेपानीको समस्या भएकाले महाकाली नदीको पुलघाट (दार्चुला पारि) बाट लिफ्ट गर्न सहमति मागेका छन् । नेपाली पक्षले भने यस विषयमा सरकारलाई जानकारी गराउने बताएका छन् । भारतको पिथौरागढमा भएको नेपाल–भारत समन्वय बैठकमा नेपालको तर्फबाट बैतडी र दार्चुला र पिथौरागढ जिल्लाका प्रमुख अधिकारी र सुरक्षा निकायका प्रमुखहरूको सहभागिता रहेको जनाइएको छ ।
बैठकमा भारतले विस्फोटक पदार्थ प्रयोग गरी महाकाली नदी किनारमा सडक निर्माण गर्दा ढुङ्गा/ माटोले नदीको बहाव बढ्न गई समस्या पैदा भएको प्रति दुई वटै देशका प्राविधिक मिलेर नदीको अवरोध हटाउने सहमति भएको छ ।
नेपालबाट बैतडीका प्रमुख जिल्ला अधिकारी सुरेश पन्थी, दार्चुलाका प्रमुख जिल्ला अधिकारी किरण जोशी, बैतडी जिल्ला प्रहरी प्रमुख प्रहरी नायब उपरीक्षक प्रेमबहादुर शाही, सशस्त्र प्रहरी बल नेपालका जिल्ला प्रमुख गङ्गादत्त पन्त, राष्ट्रिय अनुसन्धान विभागका प्रहरी नायब उपरीक्षक अर्चना सिन्हा, दार्चुला प्रहरी प्रमुख तर्कराज पाण्डेय, सशस्त्र प्रहरी बल दार्चुलाका प्रमुख डम्बर विष्टलगायतको सहभागिता रहेको थियो ।
नेपाली अधिकारीहरूले महाकाली नदीमा भारतीय पक्षबाट फोहोर हुँदा नदी दूषित बन्दै गएकाले महाकालीलाई डम्पिङसाइट नबनाउन आग्रह गरिएको छ । दुई वटै देशका सहरको फोहोर व्यवस्थापन गर्ने सहमति भएको छ ।
नेपाल–भारतका प्रमुख जिल्ला अधिकारीको समन्वय बैठकमा विपत्का बेला महाकाली नदीमा रबर बोट चलाउने सहमति भएको बैतडीका प्रमुख जिल्ला अधिकारी सुरेश पन्थीले बताउनुभयो । दार्चुलाका प्रमखु जिल्ला अधिकारी किरण जोशीले भारतबाट नसालु औषधी नेपाल भित्रिने गरेकाले त्यस्ता औषधीको बिक्री वितरण रोक्न प्रस्ताव राख्नुभएको छ । उहाँले दार्चुलाको व्यासमा बिजुली नभएकाले जेनेरेटर चलाउन भारतबाट इन्धन ल्याउन सहज वातावरण बनाउन माग गर्नुभएको छ ।
नेपालीका लागि एक घण्टा अगावै पुल खुल्ने
नेपाल–भारत समन्वय बैठकले नेपालीको सहजताका लागि झुलाघाटको पुल एक घण्टा चाँडो (बिहान ६ बजे खोल्ने र साँझ ७ बजे बन्द गर्ने) सहमति भएको छ । बैतडीका प्रमुख जिल्ला अधिकारी पन्थीले झुलाघाट पुल यसअघि ७ बजे खुल्ने गरेकोमा अब नेपालीको सहजताका लागि एक घण्टाअगाडि नै खुल्ने बताउनुभयो । झुलाघाटबाट पिथौरागढ हुँदै भारतका अन्य जिल्ला जाने सरकारी बस (रोडबेजको बस) हरेक दिन बिहान ७ बजे छुट्ने गरेको छ ।
“झुलाघाटको पुल ६ बजे बिहान खुल्ने भएपछि नेपाली यात्रुले भारतीय सवारी अग्रिम बुकिङ गर्नुपर्ने बाध्यता हट्ने भएको छ,” प्रमुख जिल्ला अधिकारी पन्थीले भन्नुभयो । “ अब सस्तो भाडा दरमा चढ्न मिल्ने र यातायात सेवा सहज हुने,” उहाँले बताउनुभयो । झुलाघाट मोटरेबल पुलको लम्बाइ ५५० मिटर र उचाइ १५० मिटर हुने गरी प्राविधिक निर्णय गरेर केन्द्र सरकारलाई लेखी पठाउने तयारी भइरहेको जानकारी समेत दिइएको छ ।
