काठमाडौँ, असार १६ गते । नेपाल स्क्वास र्याकेट्स सङ्घको अध्यक्षमा ध्रुवबहादुर गुरुङ चयन हुनुभएको छ । सङ्घको १४औँ वार्षिक साधारण सभा र पाँचौँ अधिवेशनले आगामी चार वर्षका लागि गुरुङलाई चयन गरेको हो ।
उहाँले अध्यक्ष पदका लागि भएको मतदानमा मनोजबहादुर श्रेष्ठलाई निराश पार्नुभयो । यसअघि, गुरुङ स्क्वास र्याकेट्स सङ्घमा सल्लाहकारको भूमिकामा हुनुहुन्थ्यो । यसैगरी, उहाँ स्क्वास र्याकेट्स सङ्घको पूर्व महासचिव पनि हुनुहुन्छ ।
अन्य सबै पद निर्विरोध रहे । उपाध्यक्षमा प्रेम सिंह, सुदीपबहादुर सिंह, दिलीप नरसिंह अधिकारी, जगतसुन्दर सैंजु र रुपकदास ताम्राकार चयन हुनुभएको छ । महासचिवको जिम्मेवारी लोकेन्द्रमान सिं भण्डारीले पाउनुभयो ।
शैलेस अमात्य कोषाध्यक्ष र महेन्द्र महर्जन सचिवको जिम्मेवारीमा हुनुहुन्छ । सदस्यहरूमा राजेन्द्र शाक्य, लालबहादुर गुरुङ, अनिल बज्राचार्य, विदुर धमला, रत्न महर्जन, राकेशकुमार गुप्ता, गिन्दिरा श्रेष्ठ र भावना सुनुवार रहनुभएको छ ।
यसअघि, राष्ट्रिय खेलकुद परिषद्का सदस्यसचिव टङ्कलाल घिसिङले उद्घाटन गर्नुभएको थियो । सो समारोहमा होङजोउ एसियाडमा नेपालको प्रतिनिधित्व गर्ने स्क्वासका छ खेलाडी अर्हन्त केशर सिंह, अमृत थापामगर, अमिर ब्लोन, कृष्णा थापा, बिपना ब्लोन र स्वस्थानी श्रेष्ठलाई सम्मान गरिएको थियो ।
