जीवन आफैँ बनाउने हो (कविता)

आँखा लाइरहेको छु, सूर्य कैले उदाउने हो

बसेर एक मधुर गीत, मैले कैले गाउने हो ।

बाटाका भीर, पहरा छिचोल्दै अघि बढ्नु छ

निराशा आए हौसला, आफैँले जगाउने हो ।

जीवनको फूलबारीमा, पसिना खूब बगाऊँ

खुसीको अश्रुधाराबाट, दुःखलाई बगाउने हो ।

परायाको भीडमा खोजूँ, मेरो पनि कोही छ कि

दुःखमा हात जो दिन्छ, उसित मीत लगाउने हो ।

राप, ताप पनि धेरै भो, जीवन जलिरहेको छ

चन्द्रमासित भनी सापटी, शीतलता मगाउने हो ।

खोजी खोजी टिपी टिपी, हाँसो खुसी सँगाल्नु छ

मनको कुना कुनाबाट, वेदना भगाउने हो ।