यौटै नै पद हो र काम छ उही एकै छ झन् वेतन
फर्कन्छन् घरमा दुबै सँगसँगै थाकेर उस्तै तन
आई सुत्छ तुरुन्त झन् पति उता डङ्ग्रङ्ङ ओछ्यानमा
पत्नीले घरका सबै चिजहरू राख्छिन् यथा स्थानमा ।
छन् सन्तान कहाँ र काम तिनको खोज्छिन् तुरुन्तै उनी
धोएका कपडाहरू कुन कता ल्याई समाल्छिन् अनि
लाग्यो प्यास भनेर माग्छ पतिले दिन्छिन् तुरुन्तै जल
लाग्ने गर्छ थकाइ ता तर उनै छन् काममा तत्पर ।
खाजा खान्छु भनेर पिर्दछ यता छोरा र छोरी पनि
के के माग सबै सुनेर उनले खाजा तयारी अनि
के के कार्य भए नयाँ पठनमा छन् के अरू योजना
आफ्ना बालकका सुनी सब कुरा ती माग पूरा सदा ।
कापी पेन्सिल वा अरू कति कुरा के माग्दछन् ती सबै
सारा थोक जुटाउँदा तन बढी थाक्दो छ धेरै अझै
खानाको पनि जोरजाम उनले गर्नै छ छिट्टै उता
ती श्रीमान् पनि फुत्त बाहिरतिरै निस्के कता हो कता ?
यस्तै हाल छ आज दैनिकजसो ती कामकाजी हुँदा
दोहोरो अझ मारमा हुन गए नारीहरू सर्वदा
बाडौँ काम भनेर सोच बटुले राम्रो हुनेथ्यो अति
केही फुर्सद पाउँथिन् र तनमा आराम मिल्थ्यो कति ।
