गोकर्ण पौडेल/लीलाधर वली
तुलसीपुर असार १ गते । राप्ती राजमार्गअन्तर्गत तुलसीपुर ३ को शिरखोलामा जिप दुर्घटना हुँदा ९ जना घाइते भएका छन् । तुलसीपुरबाट रोल्पाको ओतका लागि छुटेको रा १ ज ५५६ नम्बरको जिप दुर्घटना हुँदा गाडीमा सवार दुई बालकसहित ९ जना घाइते भएका हुन् ।
तुलसीपुरबाट यात्रुसहित रोल्पातर्फ जाँदै गरेको रा १ ज ५५६ नम्बरको जिप पौने ११ बजेतिर सडकबाट करिब ६० मिटर तल खसेको इलाका प्रहरी कार्यालय तुलसीपुरका प्रमुख प्रहरी नायव उपरीक्षक पुष्पराज मल्लले जानकारी दिनुभयो । उहाँका अनुसार दुर्घटनामा परि ९ जना घाइते भएका छन् भने केहीको अवस्था गम्भीर छ ।
घाइतेहरूलाई उद्धार गरेर तुलसीपुरस्थित राप्ती प्रादेशिक अस्पतालमा उपचारका लागि ल्याएको प्रहरी नायव उपरीक्षक मल्लले बताउनुभयो । दुर्घटनाको विस्तृत विवरण भने आउन बाँकी छ ।
