.jpg)
रेखीराम राना
पाल्पा, जेठ ३२ गते । पाल्पामै पहिलो पटक सवारी चालक अनुमति पत्र (लाइसेन्स) परीक्षाको लागि आवेदन खुला भएको छ । यातायात व्यवस्था सेवा कार्यालय पाल्पाले जेठ ३० गतेदेखि अनलाइन प्रणालीमार्फत मोटरसाइकल र स्कुटीको लाइसेन्सको लागि आवेदन खुला गरेको हो ।
कार्यालयले मोटरसाइकल तर्फ वर्ग (ए) र स्कुटरतर्फ वर्ग (के) को नयाँ लाइसेन्स जारी गर्न आवेदन खुला गरिएको जनाएको छ । लाइसेन्सका लागि परीक्षा दिने प्रशिक्षार्थीले अनलाइनमार्फत परीक्षा दिन सक्ने कार्यालय प्रमुख केशव सुनारले जानकारी दिनुभयो ।
तानसेन-७ बर्तुंङमा रहेको सेवा कार्यालयबाट उक्त सेवा दिइने छ । कार्यालय जेठ ४ गतेदेखि लाइसेन्स नवीकरणको सेवा समेत दिइरहेको छ । जिल्लाबाटै लाइसेन्स दिने र नवीकरणको सेवा सुरु भएसँगै सेवाग्राहीलाई सहज भएको छ । लाइसेन्सको सम्पूर्ण कामका लागि बुटवल, पोखरा जानुपर्ने बाध्यता हटेको भन्दै सवारी चालकहरू समेत उत्साहित भएका छन् ।
पाल्पामा सवारी चालक परीक्षण केन्द्र (ट्रायल सेन्टर) को समेत निर्माण भइसकेको छ । यातायात व्यवस्था सेवा कार्यालयले तानसेन नगरपालिका-७, ठाँटी क्षेत्रमा ट्रायल सेन्टर निर्माण गरेको कार्यालय प्रमुख सुनारले बताउनुभयो । यातायात व्यवस्था विभागको स्वीकृतिपछि ट्रायल सेन्टरको सेवा समेत सञ्चालनमा ल्याइने उहाँले बताउनुभयो ।
ट्रायल सेन्टरले पाल्पासहित यस भेगका सेवाग्राही लाभान्वित हुनेछन् ।
