बुटवल समाचारदाता
बुटवल, जेठ २५ गते । रुपन्देहीको ग्रामीण क्षेत्रका संस्थागत विद्यालयमा विद्यार्थीको आकर्षण बढेको छ। सामुदायिक विद्यालयले पढाइलाई नतिजामुखी बनाउन थालेपछि संस्थागत विद्यालयमा भन्दा सामुदायिक विद्यालयमा विद्यार्थीको भर्ना बढ्दै गएको छ। रुपन्देहीको कञ्चन गाउँपालिका–३ मा रहेको हरैया माध्यमिक विद्यालय विद्यार्थीको रोजाइमा पर्न थालेको छ। लुम्बिनी नजिकै पर्सा लौन्डियाका निष्मा यादव कक्षा ८ सम्म बोर्डिङ पढेर यो शैक्षिक सत्रदेखि कक्षा ९ मा हरैया माध्यमिक विद्यालयमा भर्ना हुनुभएको छ।
नयाँ शैक्षिक सत्र सुरु भएको धेरै भएको छैन तर निष्मालाई हरैया माविका शिक्षकको पढाउने शैलीले प्रभावित गरेको छ। सुरुमा अरू विद्यार्थीले भने सुनेका आधारमा भर्ना भए पनि पढ्दै जाँदा यो विद्यालय बोर्डिङभन्दा पनि राम्रो पाएको उहाँले बताउनुभयो। निष्मा जस्तै अनुप थापाक्षेत्री पनि राम्रो पढाइ हुने सुनेर हरैया माध्यमिक विद्यालयमा पढ्न आएको बताउनुहुन्छ। अहिलेसम्म बोर्डिङ स्कुलमा अध्ययन गरेका उहाँ सरकारी विद्यालयमा पढ्न आउँदा कुनै पछुतो नभएको बरु एक महिनाको पढाइ तुलना गर्दा बोर्डिङभन्दा सरकारी विद्यालयमा पढाइ राम्रो लागेको उहाँको भनाइ छ। बोर्डिङमा जस्तै सामुदायिक विद्यालयमा पनि कम्प्युटर ल्याब छ। साथै अरू थुप्रै भौतिक पूर्वाधारले पनि उहाँलाई हरैया माविको पढाइले मन जितेको छ।
निष्मा र अनुप जस्तै बोर्डिङ छाडेर हरैया माविमा भर्ना हुन आएका अरू विद्यार्थीले पनि सरकारी विद्यालयको पढाइ राम्रो हुँदैन भन्ने बाहिरको हल्ला सत्य नरहेको तर्क गर्छन्।
बरु पछिल्लो समय सामुदायिक विद्यालयले नतिजा राम्रो दिन थालेको उनीहरूको भनाइ छ। सामुदायिक विद्यालयमा पढाइ राम्रो हुँदै गएको र शिक्षकले समेत धेरै मेहनत गरेर पढाएको विद्यार्थीको भनाइ छ। विद्यार्थीका भनाइमा सामुदायिक विद्यालयका विषयमा बाहिर जुन हल्ला छ, त्यो एकदमै गलत छ। बरु अहिले सामुदायिक विद्यालयका शिक्षकले राम्रो पढाउनुहुन्छ, विद्यार्थीको पढाइमा एकदमै ख्याल गरेका छन्।
हरैया माध्यमिक विद्यालयका प्रधानाध्यापक मेघनाथ शर्मा पनि पछिल्लो समय विद्यालयको नतिजा बोर्डिङ स्कुलको जस्तै आउन थालेको र यसमा विद्यार्थीसँगै शिक्षकको समेत राम्रो भूमिका रहेको बताउनुहुन्छ। शर्माका अनुसार बुटवलका नाम चलेका कालिका माध्यमिक विद्यालय जस्तै हरैया माध्यमिक विद्यालयको पनि नतिजा राम्रो आएको छ। हरैया माविमा बाल कक्षादेखि १२ कक्षासम्म पढाइ हुने गरेको छ। कक्षा ५ सम्म अङ्ग्रेजी र नेपाली माध्यममा कुनै पनि शुल्क लाग्दैन। कक्षा ६, ७ र ८ सम्म परीक्षा शुल्क र टाई, बेल्टबाहेक कुनै शुल्क लाग्दैन।
प्रधानाध्यापक शर्मा भन्नुहुन्छ, “सहयोगका नाममा हामीले कुनै पनि शुल्क लिँदैनौँ। कक्षा ९ मा वार्षिक रूपमा दुई हजार चार सय र कक्षा १० मा तीन हजार मात्रै शुल्क लाग्छ। अङ्ग्रेजी माध्यममा भए पनि हामीले छुट्टै शुल्क लिँदैनौँ।
हरैया माध्यमिक विद्यालयले कक्षा ९ देखि १२ सम्म कम्प्युटर इन्जिनियरिङको पढाइ पनि सञ्चालन गर्दै आएको छ। एउटा कक्षामा कम्तीमा ४० र बढीमा ६० जना विद्यार्थी राखेर पढाइ हुने गरेको छ। विद्यालयको भौतिक पूर्वाधार सीमित हुँदा यो वर्ष विद्यालयमा भर्ना हुन आएका सबै विद्यालयले भर्ना पाएनन्। थप कक्षाकोठा नहुँदा समस्या देखिएको छ। विद्यालयले आगामी दिनमा थप कक्षाकोठा व्यवस्थापन गरेर भर्ना हुन आएका विद्यार्थी नफर्काउने प्रतिबद्धता जनाएको छ।
हरैया माध्यमिक विद्यालय जस्तै कञ्चन, गैडहवा र सैनामैना नगरपालिकाका सामुदायिक विद्यालयमा विद्यार्थीको सङ्ख्या बढिरहेको छ।
