गोदावरी (ललितपुर), जेठ २२ गते । ललितपुरमा वृक्षारोपण र सरसफाइ कार्यक्रम आयोजना गरी विश्व वातावरण दिवस मनाइएको छ ।
डिभिजन वन कार्यालय ललितपुर र वातावरण क्षेत्रमा काम गर्दै आएका सङ्घसंस्थाको अगुवाइमा जनचेतनामूलक कार्यक्रमका साथै वृक्षारोपण र सरसफाइ गरी दिवस मनाइएको हो । संयुक्त राष्ट्रसङ्घीय वातावरण कार्यक्रमको आह्वानमा सन् १९७३ देखि प्रारम्भ भई हरेक वर्ष जुन ५ मा विश्व वातावरण दिवस मनाउन लागिएको हो । यस वर्ष ‘प्लास्टिकजन्य प्रदूषण निर्मूल पारौँ, वातावरणमैत्री विकल्पको उपयोग गरौँ’ भन्ने मूल नाराका साथ दिवस मनाउन लागिएको छ ।
“प्रकृतिलाई प्लास्टिकमुक्त बनाइ पर्यावरणलाई संरक्षण गर्नु आवश्यक छ,” ललितपुर महानगरपालिकाका प्रमुख चिरिबाबु महर्जनले, “प्लास्टिकको झोला तथा सामग्रीको साटो कपडालगायतका वातावरणलाई कम हानी गर्ने सामग्रीको प्रयोग बढाउनुपर्ने बताउनुभयो ।
डिभिजन वन कार्यालय ललितपुरका सूचना अधिकारी थीरप्रसाद कोइरालाले दिवसका अवसरमा महानगरपालिका प्रमुख महर्जनको अगुवाइमा ग्वार्कोदेखि लामाटारसम्मका सडक पेटीमा वृक्षारोपण गरिएको जानकारी दिनुभयो । रासस
