साधन घर्ती
म्याग्दी (दरबाङ), जेठ २० गते । प्रेस चौतारी नेपाल म्याग्दी शाखाले पत्रकार कृष्ण जिसीलाई सम्मानित गरेको छ । चौतारीको शनिबार बेनीमा सम्पन्न १८ औँ वार्षिक साधारण सभा तथा सम्मान कार्यक्रमको अवसरमा सृजनशील पत्रकारिता पुरस्कार– २०७९ बाट जिसीलाई नगद ५ हजार पाँच सय ५५ रुपियाँसहित सप्रमाणपत्र र दोसल्लाले पुरस्कृत गरिएको हो ।
नेपाल पत्रकार महासंघ म्याग्दी शाखाका कार्यसमिति सदस्य समेत रहनुभएका जिसीलाई कार्यक्रममा प्रेस चौतारी नेपालका केन्द्रीय अध्यक्ष गणेश बस्नेत, नेकपा एमाले गण्डकी प्रदेश कमिटी अध्यक्ष नवराज शर्मा र प्रेस चौतारी म्यादीका अध्यक्ष प्रताप बानियाँलगायतले पुरस्कार वितरण गर्नुभयो ।
सो कार्यक्रममा बोल्ने वक्ताहरूले पत्रकारिता पेसालाई मर्यादित र विश्वसनीय बनाउन आग्रह गर्नुभयो । प्रेस चौतारी नेपालका केन्द्रीय अध्यक्ष बस्नेतले नेपाली प्रेसले लोकतन्त्रका पक्षमा कलम चलाउँदैआएको चर्चा गर्नुभयो । उहाँले विभिन्न कारणले समाजमा पछाडि पारिएका समुदाय र विकास निर्माणमा हुने ढिलासुस्ती तथा विकृतिका बारेमा कलम चलाउनुपर्नेमा जोड दिनुभयो ।
देशमा लोकतन्त्र, गणतन्त्र र सङ्घीयता स्थापना गर्न नेपाली पस्रे जगतको ठुलो योगदान रहेको उल्लेख गर्नुभयो । पत्रकार पनि समाजको अभिन्न अङ्ग भएकाले राजनीतिक दलले पत्रकार र पत्रकारिता पेसामाथि हेर्ने दृष्टिकोण परिवर्तन गर्न आवश्यक रहेको उहाँले बताउनुभयो । पत्रकारिता पेसालाई मर्यादित र विश्वसनीय बनाउन अध्यक्ष बस्नेतले बताउनुभयो ।
पत्रकारिता पेसा र पस्रे जगतको हकहित संरक्षण र प्रवर्धन गर्न सबै पेसागत सङ्गठनहरू एक हुनुपर्ने बताउनुभयो । पत्रकारिता क्षेत्रमा देखिएको विकृति हटाउन पनि पत्रकार महासङ्घको शुद्धीकरण अभियानलाई देशभर प्रभावकारी बनाउन आवश्यक रहेको बताउनुभयो ।
एमाले गण्डकी कमिटी अध्यक्ष शर्माले राजनीतिक क्षेत्रमाजस्तै पत्रकारिता क्षेत्रमा पनि विकृतिहरू देखिन थालेको भन्दै पत्रकार र प्रेस जगतलाई मर्यादित र विश्वसनीय बनाउन आग्रह गर्नुभयो । पत्रकारिता क्षेत्रको हकहितका लागि पार्टीले सहयोग गर्ने प्रतिबद्धता जनाउनुभयो ।
कार्यक्रममा एमाले म्याग्दीका अध्यक्ष देवेन्द्र केसी, प्रेस चौतारी नेपालका उपाध्यक्ष गणेश पाण्डे, प्रेस चौतारी नेपाल गण्डकी प्रदेश इन्चार्ज रामकृष्ण ज्ञवालीलगायतले पत्रकारिता क्षेत्रलाई मर्यादित र विश्वसनीय बनाउनुपर्नेमा जोड दिनुभयो ।
