देवरामप्रसाद यादव
सप्तरी, जेठ १२ गते । सप्तरीमा सवारी दुर्घटनामा परी दुई युवकको मृत्युु भएको छ । एक जना गम्भीर घाइते भएको सप्तरी प्रहरीले जनाएको छ । सप्तरीको राजविराज छिन्नमस्ता सडक खण्ड अन्तर्गत सखडामा भएको मोटरसाइकल दुर्घटनामा परी दुई युवकको मृत्युु भएको हो । अर्का एक जना गम्भीर घाइते हुनुभएको छ ।
सदरमुकाम राजविराजबाट सखडातर्फ जाँदैगरेको प्रदेश २ – १०१–००२ प २५६० नम्बरको मोटरसाइकल अनियन्त्रित भई दुर्घटना हुँदा दुई जना युवकको घटनास्थलमै मृत्युु भएको प्रहरीको भनाइ छ ।
दुर्घटनामा छिन्नमस्ता गाउपालिका –३ का जोगेन्द यादवको छोरा १८ बर्षीय श्यामकुमार यादव र मोटरसाइकल पछाडि सवार सोही ठाउँका रघुवीर खङ्गका ३० बर्षीय छोरा बिकासकुमार खङ्गको मृत्युु भएको प्रहरीले जनाएको छ ।
सोही दुर्घटनामा मोटरसाइकल पछाडि सवार अर्का लालबहादुर खङ्गका २३ वर्षीय छोरा अजयकुमार खङ्ग गम्भीर घाइते भएको जिल्ला प्रहरी कार्यालय सप्तरीका सुचना अधिकारी प्रहरी नायव उपरीक्षक नरेशकुमार सिंहले जानकारी दिनुभयो ।
घाइते खङ्गको हाल राजविराजस्थित गजेन्द्रनारायण सिंह अस्पतालमा उपचार भइरहेको छ । घटनाको थप अनुसन्धान भइरहेको सप्तरी प्रहरीले जनाएको छ । मृतक दुवै युवकको शव पोष्टमार्टमका लागि राजविराजस्थित गजेन्द्रनारायण सिंह अस्पतालमा राखिएको प्रहरीले जनाएको छ ।
