काठमाडौं, जेठ ६ गते । सामुदायिक विद्यालयमा शिक्षण विधि र सिकाइ पद्धतिको जानकारी लिन काठमाडौं महानगरपालिकाका प्रमुख बालेन्द्र साह (बालेन) ले निरीक्षण गर्नुभएको छ । यस क्रममा हिजो (शुक्रबार) प्रमुख साह शिवपुरी माध्यमिक विद्यालय, महाराजगञ्ज र पद्मकन्या माध्यमिक विद्यालय डिल्लीबजार पुग्नुभयो । गएको हप्ता दरबार हाइ स्कूलको अवलोकन गर्नुभएको थियो ।
प्रमुख साहले भन्नुभयो, ‘‘म काठमाडौं महानगरपालिकामा प्रमुखको रूपमा निर्वाचित भए देखि नै शिक्षा क्षेत्रको विकास र सुधारका कार्यक्रमलाई प्रमुख प्राथमिकतामा राखेको छु । पछिल्लो समय हरेक शुक्रबार विद्यालयमा विद्यार्थीहरुसँगै बस्ने र सँगै बसेर सिक्ने गरेको छु ।’’
अवलोकनका विषयमा प्रमुख साह भन्नुहुन्छ, ‘‘हिजो शुक्रबार बिहान काठमाडौंको शिवपुरी माध्यमिक विद्यालयको निरीक्षण गरियो । शिक्षामा सीप कार्यक्रममार्फत विद्यार्थीहरूसँगै बसेर सिक्न मौका पाएँ । साथै बुक फ्री फ्राइडे कार्यक्रममा विद्यार्थी र शिक्षकहरूको सहभागिताको बारेमा बुझ्न पाएँ । निरीक्षण अनुगमनका क्रममा शिक्षामा सीप कार्यक्रमले विद्यार्थीको भविष्य निर्माणका लागि पार्ने प्रभावको बारेमा बुझ्ने मौका पाएँ । विद्यालयहरूको वर्तमान अवस्था, समग्र विकासका लागि आवश्यक पर्ने पूर्वाधार, स्रोतसाधन र अन्य आवश्यकताका बारेमा जानकारी लिएको छु ।’’
शिवपुरी माध्यमिक विद्यालयमा पाक कला र मोबाइल इलेक्ट्रोनिक्स गरी दुई वटा कक्षा सञ्चालनमा छन् । डिल्लीबजारमा रहेको पद्मकन्या विद्याश्रममा सिपमा शिक्षा कार्यक्रमअन्तर्गत स्केचीङ र मूर्तिकला, फेसन र कपडा निर्माण जस्ता कार्यक्रममा सञ्चालन भइरहेका छन् ।
‘बुक फ्री फ्राइडे’ कार्यक्रमअन्तर्गत विद्यार्थीहरू पत्रपत्रिका पठन, भाषण तथा कविता वाचन कला, खेलकुद, चित्रकला, सर्वेक्षण, विज्ञान प्रयोगशाला जस्ता विधा र क्षेत्रमा सहभागी भएका छन् । प्रमुख साहले निरीक्षणको अन्त्यमा शौचालयको उपलब्धता, अवस्था र सरसफाइका पक्ष हेर्नुभएको थियो ।
