सिराज खान
नेपालगञ्ज, चैत २६ गते । पश्चिम नेपालको बाँके र बर्दिया लगायतका थारु समुदायमा सिकलसेल एनिमिया नियन्त्रणका लागि कोहलपुर नगरपालिकाले विभिन्न योजना बनाएर कार्यान्वयन सुरु गरेको छ । सिकलसेल एनिमिया नियन्त्रणका लागि कोहलपुर नगरपालिकाले गर्भवती र नौ महिनाका बालबालिकाको अनिवार्य सिकलसेल जाँच गर्न सुरु गरेको हो ।
“वंशाणुगत यो रोगको समयमै पहिचान गरी त्यसको नियन्त्रणका लागि गर्भवती र नौ महिनाका बालबालिकामा रगत परीक्षण गरेर सिकलसेल जाँच गर्न सुरु गरिएको हो,” कोहलपुरका मेयर पूर्ण प्रसाद आचार्यले भन्नुभयो । उहाँले कोहलपुर नगरपालिकामा थारु समुदायसँगै अन्य समुदायमासमेत सिकलसेल एनिमिया देखा परेकोले सिकलसेलको चेन ब्रेक गर्नका लागि गर्भवती र नौ महिनाका बालबालिकामा सिकलसेल जाँच अनिवार्य गरिएको बताउनुभयो ।
सिकलसेल एनिमिया प्रयोगशालाका ल्याब प्रमुख शिव गौतमका अनुसार नौ महिनामा दादुरा खोप लगाएपछि बालबालिकाको सिकलसेल जाँच गरिने छ भने गर्भवतीको हकमा भने गर्भ रहेको ६–७ महिनामा सिकलसेल जाँच अनिवार्य गर्ने गरी पालिकाका १५ वटै वडामा अभियान सुरु गरिएको छ ।
समुदायमा सचेतना बढेसँगै पहिलेको तुलनामा अहिले सिकलसेल परीक्षण दर पनि वृद्धि भएको ल्याब प्रमुख गौतमले बताउनुभयो । उहाँका अनुसार अहिले दैनिक रूपमा प्रयोगशालामा आएर थारु समुदाय तथा अन्य समुदायहरूले पनि सिकलसेल जाँच गर्नेक्रम बढेको छ ।
सिकलसेल तथा थालेसेमिया रोग नियन्त्रणका लागि विज्ञ मानिनुहुने भेरी अस्पताल नेपालगञ्जका प्रमुख कन्सल्टेन्ट फिजिसियन डा.राजन पाण्डेले आफै खटिएर सो नियन्त्रणका लागि जनेचतनामुलक कार्यक्रमको नेतृत्व गर्दै आउनुभएको छ ।
डा.पाण्डेकै पहलमा कोहलपुर नगरपालिकाले सिकलसेल तथा थालेसेमिया रोग नियन्त्रणका लागि गर्भवती तथा नौ महिनाका बालबालिकाको सिकलसेल परीक्षण अनिवार्य गरेको हो ।
विवाहपूर्व रगत जाँच गरेर मात्रै विवाह गर्ने, नौ महिनाको बच्चालाई दादुराको खोप लगाउन आउँदा हेमोग्लोविन जाँच गर्ने, गर्भवती महिलाको पनि हेमोग्लोविन जाँच गरी सबैको रेकर्ड राखेर काम गर्दा मात्र सिकलसेल र थालेसिमिया रोग नियन्त्रण गर्न सकिने चिकित्सकहरूको भनाइ छ ।
