अविनाश चौधरी
धनगढी, चैत २२ गते । कैलालीको धनगढी उपमहानगरपालिका –१३ राजपुरमा ५० शैय्याको प्रादेशिक आयुर्वेद चिकित्सालय सञ्चालनमा आएको छ ।
सङ्घीय सरकारको ३४ करोड रुपियाँ लगानीमा निर्माण सम्पन्न भई सुविधायुक्त आयुर्वेद चिकित्सालय सञ्चालनमा आएको हो । चिकित्सालयको सुदूरपश्चिम प्रदेशका मुख्यमन्त्री कमलबहादुर शाहले आज बिहान उद्घाटन गर्नुभयो ।
उद्घाटनको क्रममा मुख्यमन्त्री शाहले योग र आयुर्वेद उपचार पद्धतिप्रति मान्छेको आकर्षण दिनप्रति दिन बढ्दै गएको बताउनुभयो ।
यस्तै, भौतिक पूर्वाधार विकासमन्त्री प्रकाशबहादुर देउवाले आयुर्वेद चिकित्सालयलाई प्रदेश सरकारको सदैव सहयोग रहने बताउनुभयो ।
चिकित्सालयबाट ल्याब, ओपीडी, पूर्व कर्म, पञ्चकर्म लगायतका सेवा प्रदान भइरहेको वैद्य निरीक्षक सुरेन्द्रबहादुर शाहीले जानकारी दिनुभयो । उहाँले अस्पतालमा विशेषज्ञ सेवा थप्न प्रदेश सरकारले सहयोग गर्नु पर्ने बताउनुभयो । चिकित्सालयबाट सबै सेवा निःशुल्क रूपमा प्रवाह भइरहेको छ । चिकित्सालयमा पेट समस्या, पाइल्स, फिस्टुला, बाथलगायतको उपचार हुने गरेको जनाइएको छ ।
सङ्घीय सरकारले निर्माण पश्चात् यो चिकित्सालय सञ्चालनका लागि सुदूरपश्चिम प्रदेश सरकारलाई हस्तान्तरण गरेको छ ।
