आयुर्वेदिक औषधिप्रति विश्वास बढ्दै

सिन्धुली समाचारदाता

सिन्धुलीमाढी, चैत २० गते । चार वर्षअघिसम्म सिन्धुली जिल्लामा आयुर्वेद औषधिको प्रयोग गर्ने बिरामीको सङ्ख्या निकै कम थियो। जब विश्वभर महामारीका रूपमा कोरोना भाइरसको सङ्क्रमण फैलियो, त्यसपछि जिल्ला आयुर्वेद स्वास्थ्य कार्यालयमा आई उपचार गरी आयुर्वेदिक औषधि सेवन गर्ने बिरामीको चाप बढ्दै गएको छ। 

पछिल्लो समय आयुर्वेद स्वास्थ्य केन्द्रमा आएर जाँच र औषधि लिने बिरामी बढेका जिल्ला आयुर्वेद स्वास्थ्य कार्यालय सिन्धुलीले जनाएको छ। कार्यालयका अनुसार सबैभन्दा बढी दीर्घरोगी र ज्येष्ठ नागरिकले सेवा लिइरहेका छन्। विशेषगरी ग्यास्ट्रिक, पेट दुख्ने, दम, हाडजोर्नी, खाना नरुच्ने, बाथलगायतका समस्या भएका बिरामी यहाँ उपचार गर्न आउने गरेका छन्। 

आयुर्वेदिक औषधिमा विश्वास कम गर्ने पनि पछिल्लो समयमा नियमित आयुर्वेदिक औषधि खाएर शरीरमा फाइदा पुगेको भन्दै आउने गरेको कार्यालयका वैद्य निरीक्षक दीपक तिमल्सिनाले जानकारी दिनुभयो।

आयुर्वेद सेवा लिन आउनेमध्ये अधिकांश बिरामी पेटसम्बन्धी समस्या लिएर आउने गरेका छन्। उहाँले भन्नुभयो, “पहिलेको तुलनामा पछिल्लो समय कार्यालयमा आएर उपचार सेवा लिने बिरामी बढ्दै गएका छन्। आयुर्वेदिक औषधिप्रति बिरामीको विश्वास बढेकै कारण यहाँ आउनेको सङ्ख्या बढेको हो।”

कार्यालयमा आउने बिरामीको तथ्याङ्क हेर्दा सबैभन्दा बढी कोभिड–१९ पछि आउने क्रम सुरु भएको पाइएको छ। आर्थिक वर्ष २०७७/७८ मा तीन हजार ५९५ महिला र तीन हजार ९९१ पुरुष गरी सात हजार ५८६ जनाले उपचार सेवा लिएका थिए। गत आर्थिक वर्षमा आठ हजार ३४६ महिला र चार हजार ५९९ पुरुष गरी १२ हजार ९४५ जनाले आयुर्वेद उपचार सेवा लिएको तथ्याङ्क छ। चालु आवको हालसम्म १४ हजारभन्दा बढीले उपचार सेवा लिइसकेका छन्।

बिरामीलाई २३ प्रकारका औषधि निःशुल्क र अरू दुई सय प्रकारका औषधि सःशुल्क वितरण गरिँदै आएको कार्यालयले जनाएको छ। आयुर्वेद औषधिको प्रयोग बढाउन ज्येष्ठ नागरिक, ट्राफिक प्रहरी, पत्रकारसँग अन्तर्क्र्रिया कार्यक्रमलगायत जनचेतनामूलक कार्यक्रम पनि गर्दै आएको वैद्य निरीक्षक तिमल्सिनाको भनाइ छ। हाल दैनिक रूपमा ५०/६० जनाको हाराहारीमा बिरामी उपचार गर्न आउने गरेका छन्।

कार्यालयले चालु आवबाट फिजियोथेरापी, अकुपन्चर, ल्याब र सशुल्क फार्मेसी सेवा सुरु गरेको छ। जिल्लाका नौ स्थानीय तहमध्ये अहिले कमलामाई नगरपालिका–१३, रानीचुरी मरिण गाउँपालिका–६, सुनकोसी गाउँपालिका–१, दुम्जा र तीनपाटन गाउँपालिकाको वडा नं. २ भीमस्थान र वडा नं. ८ बाहुनतिल्पुङमा गरी चार पालिकामा आयुर्वेद औषधालय सञ्चालनमा छन्।