काठमाडौं, चैत १४ गते। मंगलबार साँझ प्रधानमन्त्रीको सरकारी निवास बालुवाटारमा बसेको १० दलीय सत्ता गठबन्धनको बैठकमा न्यूनतम साझा कार्यक्रममाथि छलफल भएको छ।
बैठकपछि सञ्चारकर्मीसँग कुरा गर्दै नेपाली कांग्रेसका प्रमुख सचेतक रमेश लेखकले बैठक सकारात्मक रहेको र बुधवार पुनः बसेर निष्कर्ष निकाल्ने बताउनुभयो। उहाँले आजको बैठकमा सरकारको न्यूनतम साझा कार्यक्रमको मस्यौदा छलफलका लागि पेस भएको बताउनुभयो।
उहाँले भन्नुभयो, ‘‘सरकार पक्षीय राजनीतिक दलका नेताको बैठक बस्यो। बैठकमा सरकारको न्युनतम साझा कार्यक्रमको मस्यौदा छलफलका लागि पेस भयो। भोलि फेरि बैठक बस्नेछ।’’
प्रमुख सचेतक लेखकले मन्त्रालयको बारेमा केही समस्या नरहेको पनि बताउनुभयो। उहाँले आजको बैठकमा मन्त्रालय भागबण्डाको विषयले प्रवेश नपाएको प्रष्ट पार्नुभयो।
‘‘भागबण्डाको बारेमा छलफल भएन। सरकार चाँडो भन्दा चाँडो सरकार विस्तार गर्ने कुरा भयो। सरकार चाँडै विस्तार हुनेगरी छलफल भयो। मन्त्रालय नमिल्ने भन्ने समस्या छैन। गठबन्धनलाई निरन्तरता दिने कुरा भएको छ। मन्त्रालयका बारेमा कुनै विवाद छैन’’, नेता लेखकले भन्नुभयो।
