कुहिरोभित्रको घाम
रुँदै छ कि हाँस्दै छ थाहा हुन्न
मनभित्र उज्यालोको रहर
मर्दै छ कि बाँच्दै छ थाहा हुन्न ।
भोगाइका अनेक अनुच्छेदमा
पढिरहेछु जिन्दगी
सुमसुम्याइरहेछु/छामिरहेछु
निरन्तर पीडाका रापले
कठोर भएर आफैँलाई डामिरहेछु ।
सोच्छु
आखिर जिन्दगी–
बग्दै–बग्दै जाने खोला त रहेछ
मुटु चिस्याएर भाग्ने बतास त रहेछ
छल रहेछ सायद भ्रम रहेछ
सुखदुःखको अनुक्रम रहेछ ।
निरुत्तर छु
नसोध्नु मलाई
जिन्दगीको परिभाषा
उज्यालो हराउनुको खबर
दुःखेका मुटुहरूका कथा ।
भोग्दै छु
अहिले घाम पनि कुहिरोभित्र छ
सपना पनि कुहिरोभित्र छ
जिन्दगीका तमाम आशा
कतै बन्धकी छ/कतै निरीह छ
ओठमा फुल्ने खुसी पनि कुहिरोभित्र छ ।
पर्खिरहेछु
कतै बतासले फटाउँछ छ कि यो कुहिरो
कतै अनुकूल समयले हटाउँछ कि यो कुहिरो ?
