आधुनिक फुटबलमा चर्चित स्ट्राइकर क्रिस्टियानो रोनाल्डोले व्यावसायिक फुटबलको विश्राम एसियाली क्लबबाटै गर्ने लक्ष्य लिएको देखिन्छ । ३८ वर्ष लागेका रोनाल्डो साउदी अरबको व्यावसायिक लिगको क्लब अल नासरमा अनुबन्धित भएर खेलिरहेका छन् । सम्झौताअनुसार रोनाल्डो सन् २०२५ को मध्यसम्म अल नासरमै रहनेछन् । नासरबाटै उनको खेलाडी करिअरको समाप्ति हुने विश्लेषण भइरहेको छ ।
अहिलेको विश्व फुटबलमा अर्जेन्टिनी खेलाडी लियोनल मेसी सरहका चर्चित तथा बालोन डि’ओर विजेता रोनाल्डोको चर्चा सबैतिर छ । उनी युरोपका सफल खेलाडी हुन् तर युरोपेली ठूला क्लबहरूको अनुभव लिएका एक मात्र खेलाडीको अन्तिम गन्तव्य साउदी अरब भएकोमा भने धेरैले आश्चर्य व्यक्त गरिरहेका छन् ।
उनले इङ्ग्लिस प्रिमियर लिगको क्लब म्यानचेस्टर युनाइटेड, स्पेनी लिगको क्लब रियल म्याड्रिड र इटालीको लिगको क्लब युभेन्टसमा सबैभन्दा बढी समय व्यावसायिक फुटबल खेले । दुई सिजनअघि पुरानो क्लब म्यानचेस्टर युनाइटेडमा आएका उनी खासै सन्तुष्ट हुन सकेका थिएनन्, न त उनले क्लबलाई राम्रो नतिजा पस्किन सकेका थिए ।
कतारमा भएको विश्वकपअघि नेदरल्यान्ड्सको एक टेलिभिजनलाई दिएको अन्तर्वार्ताका कारण विवादमा तानिएपछि म्यानचेस्टर युनाइटेड र रोनाल्डोबीच असमझदारी बढेको थियो । यसका कारण दुवै पक्ष सम्झौता रद्द गर्न सहमत भए । कतार विश्वकपका बेलामा क्लबविहीन बन्न पुगेका रोनाल्डोले विश्वकपमा पोर्चुगललाई क्वाटरफाइनलको यात्रासम्म तय गराउन सके । पोर्चुगल मोरक्कोद्वारा १–० ले पराजित भयो । टिमका प्रशिक्षकसँग पनि उनको राम्रो समझदारी थिएन ।
रोनाल्डो विश्वकपको पाँचवटै संस्करणमा गोल गर्ने एक मात्र खेलाडी हुन् । सन् २०१८ को रुस विश्वकपमा उनले स्पेनविरुद्ध गरेको ह्याट्रिक ठूलो सफलमध्ये एकमा पर्छ ।
कतार विश्वकपबाट बाहिरिएपछि रोनाल्डोको युरोपेली क्लबहरूमा फर्किने सम्भावना कम हुँदै गएको थियो । धेरै युवा खेलाडीका ‘आइकन’ रोनाल्डोले आफू नयाँ देशमा नयाँ लिगको अनुभव लिन आतुर भएको प्रतिक्रिया दिँदै साउदी अरबको क्लबमा जाने सङ्केत गरेका थिए । नभन्दै उनी नौ पटक साउदी अरब लिग विजेता अल नासरमा आबद्ध भए ।
उनले साढे दुई वर्षको अवधिमा बीस करोडभन्दा बढी अमेरिकी डलर प्राप्त गर्ने दाबी गरिएको छ । उनी पैसाकै लागि मात्र साउदी अरब आएको विश्लेषणसमेत भइरहेको छ । त्यति मात्र हैन, साउदी अरबले विश्व फुटबलमा युरोप र ल्याटिन अमेरिकाको प्रभाव मध्यपूर्वतिर सर्दै गएको सङ्केतसमेत गरेको छ । विगतमा विदेशमा घरजग्गा कारोबार र परम्परागत व्यवसायका लागि परिचित साउदी अरब, कतार र संयुक्त अरब इमिरेट्स (यूएई)ले खेलकुद उद्योगमा ध्यान बढाउन थालेका छन् ।
विश्वकपको आयोजना सफल पारेर जसरी कतारले विश्वको ध्यान खिच्यो, त्यसरी नै साउदी अरबले पनि महँगा खेलाडी भिœयाएर ध्यान तानेको छ । त्यसै पनि रोनाल्डोलाई भिœयाएपछि क्लब निकै खुसी छ । अल नासरले उनलाई आबद्ध गरेपछि नै ट्विट गर्दै लेखेको थियो, “यो विशेष उपलब्धि हो । आज इतिहास रचिएको छ । यसले हाम्रो क्लबको मात्र मनोबल बढेको छैन, यसले सारा लिगकै मनोबल बढाएको छ । अझ भनौँ, साउदी अरब नै रोनाल्डोको आगमनको खबरले उत्साही छ । आशा छ, उनको आगमन यहाँका युवा खेलाडीका लागि ठूलो प्रेरणा बन्नेछ । तपार्इंलाई स्वागत छ, क्रिस्टियानो रोनाल्डो ।”
सात वर्षमै मैदानमा
सन् १९८५ फेब्रुअरी ५ मा जन्मिएका रोनाल्डोको पूरा नाम क्रिस्टियानो रोनाल्डो डोस सान्तोस एभिएरो हो । उनी सात वर्षको उमेरमै फुटबल खेल्न क्लबमा आबद्ध भएका थिए । सन् १९९२ देखि १९९५ सम्म उनले पोर्चुगलको एन्दोरिन्हामा रहेर खेले । त्यसपछिका दुई वर्ष नासियोनल र सन् १९९७ देखि २००२ सम्म स्पोर्टिङ सीपीसँग आबद्ध भएर खेलेका थिए ।
सन् २००३ देखि उनी इङ्गल्यान्ड लागे । म्यानचेस्टर युनाइटेडबाट उनले सन् २००९ सम्म खेल्दै १९६ खेलमा ८४ गोल गरे । सन् २००९ देखि २०१८ सम्म स्पेनी लिगको क्लब रियल म्याड्रिबाट २९२ खेल खेल्दै रोनाल्डोले ३११ गोल गरेका थिए । सन् २०१८ देखि २०२१ सम्म उनले इटालीको युभेन्टसबाट खेले, जहाँ ९८ खेल खेलेर उनले ८१ गोल गरेका थिए ।
त्यसपछि रोनाल्डो पुनः म्यान्चेस्टर युनाइटेडसँग अबद्ध भए । हाल अल नासर पुगेका रोनाल्डोले त्यहाँ गोलको खाता खोलिसकेका छन् ।
पोर्चुगलका लागि रोनाल्डोले सन् २००१ देखि अन्तर्राष्ट्रिय खेल खेल्न थालेका हुन् । उनले यू–१५ बाट नौ खेल खेलेर सात गोल गरे । यू–१७ बाट सात खेलमा पाँच गोल तथा यू–२० मा पाँच खेलबाट एक गोल उनीबाट भएको थियो । उनले यू–२१ र
यू–२३ बाट समेत खेल खेलेका थिए । सिनियर राष्ट्रिय टिमका लागि १९६ खेल खेलेर रोनाल्डोले ११८ गोल गरेका छन् ।
क्लब र देशका लागि उपाधि
उनले सन् २००२ मै स्पोर्टिङ सीपीलाई सुपरटाका क्यान्डिडो डे ओलिभिएरा उपाधि दिलाएका थिए । त्यस्तै म्यानचेस्टर युनाइटेडलाई तीन प्रिमियर लिग, एक एफए कप, दुई लिग कप, दुई कम्युनिटी कप, एक च्याम्पियन्स लिग र एक क्लब वल्र्ड कपको उपाधि जितमा योगदान गरेका थिए ।
रियल म्याड्रिडमा रहँदा उनले दुई ला लिगा, दुई कोपा डेल रे, चार च्याम्पियन्स लिग, तीन सुपर कप र तीन क्लब वल्र्ड कप जिते । त्यस्तै युभेन्टसलाई दुई सिरी ए, एक कोपा इटालिया र दुई सुपरकोप्पा इटालियाना जितमा उनले सहयोग गरे ।
राष्ट्रिय टिमका लागि उनले सन् २००३ मा टुलोन टुर्नामेन्ट, सन् २०१६ मा युरोपियन च्याम्पियनसिप र सन् २०१८–१९ मा नेसन्स लिग जितेका थिए ।
व्यक्तिगत उपाधि रोनाल्डोले फिफा बालोन डि’ओर पाँच पटक जितेका छन् । उनले सन् २००८, २०१३, २०१४, २०१६ र २०१७ मा उक्त उपाधि जितेका हुन् । उनले सन् २००८ मा फिफा विश्व खेलाडीको उपाधि जितेका थिए । सन् २०१६ र २०१७ मा उनले फिफाको उत्कृष्ट पुरुष खेलाडीको उपाधिसमेत हात पारे ।
रोनाल्डोले सन् २०२१ मा फिफाबाट आउटस्ट्यान्डिङ करिअर अचिभमेन्ट अवार्ड जितेका थिए । उनले सन् २०१६ मा फिफा क्लब वल्र्ड कप गोल्डेन बल पनि प्राप्त गरे । चार पटक युरोपियन गोल्डेन बुट पनि रोनाल्डोले हासिल गरेका थिए । उनले सन् २००४, २०१२ र २०१६ मा युरोपियन च्याम्पियनसिप टिम अफ द टुर्नामेन्टसमेत जिते ।
उनी सन् २०१६, २०१७, २०१८, २०१९ र २०२२ गरी पाँच पटक पोर्चुगलका वर्ष खेलाडी घोषित भएका थिए ।उनी दयाभावका खेलाडी पनि हुन् । थुप्रै परोपकारी संस्थामार्फत सहयोग पनि गरिरहेका छन् । भूकम्प पीडितदेखि क्यान्सर पीडितसम्मलाई उनले सहयोग गरेका छन् ।
