अविनाश चौधरी
धनगढी, फागुन ११ गते । कैलालीको धनगढीमा रहेको एसपीए कलेजले धनगढीको तारानगरस्थित मानव सेवा आश्रमलाई एक लाख रुपियाँ सहयोग गरेको छ । आफ्नो रजत जयन्तीको अवसर पारेर कलेजले आश्रममा रहेका आश्रितहरूका लागि आर्थिक सहयोग गरेको हो ।
सो आश्रममा अहिले ५२ जना असहाय ज्येष्ठ नागरिक रहेका छन् । कलेजका प्रबन्ध निर्देशक सुवास शाहीले बिहीबार आश्रमका सुदूरपश्चिम प्रदेश संयोजक आदर्श ढकाललाई एक लाख रुपियाँको चेक हस्तान्तरण गर्नुभयो ।
सो क्रममा शाहीले रजत जयन्तीमा भड्किलो कार्यक्रम गर्नुभन्दा खर्च कटाएर मानवताका लागि आश्रमलाई सहयोग गरेको बताउनुभयो । आश्रितहरूको खाना, बस्न, औषधोपचारमा सहयोग पुगोस् भनेर कलेजले आर्थिक सहयोग गरेको उहाँको भनाइ छ ।
यसैगरी, शाहीले आश्रमको भवन निर्माणमा पनि केही सहयोग गर्ने प्रतिबद्धता जनाउनुभएको छ ।
