कैलाली समाचारदाता
धनगढी, फागुन ६ गते । उपप्रधानमन्त्री एवम् अर्थमन्त्री विष्णु पौडेलले अहिलेको सत्ता गठबन्धन पाँच वर्षसम्म टिक्ने दाबी गर्नुभएको छ । नेकपा (एमाले) सुदूरपश्चिम प्रदेशस्तरीय ‘मिसन ग्रासरुट’ एकदिने अभिमुखीकरण कार्यक्रममा सहभागी हुन आउनुभएका नेकपा (एमाले)का उपाध्यक्ष पौडेलले पत्रकारसँग सङ्क्षिप्त कुराकानी गर्दै यस्तो दाबी गर्नुभएको हो।
उपप्रधानमन्त्री पौडेलले राष्ट्रपति, उपराष्ट्रपतिलगायत सबै पदमा पूर्वसहमति कार्यान्वयन हुने विश्वास पनि व्यक्त गर्नुभयो। उहाँले भन्नुभयो, “नेपाली राजनीतिमा हल्ला एकातिर हुन्छ, घटना अर्कातिर अघि बढ्छ। यो सहयात्रा कुनै काँचो धागोमा अडिएको सहयात्रा होइन। पाँच वर्षसम्म सहयात्रा निरन्तर चल्छ ।” उहाँले राष्ट्रका सबै दल मिल्नुपर्ने ठाउँमा मिलेर जाने कुरालाई नकारात्मक रूपमा लिन नहुने पनि बताउनुभयो।
एमालेको ‘मिसन ग्रासरुट’
नेपाल कम्युनिस्ट पार्टी (एमाले)को ‘मिसन ग्रासरुट’ अभियानको एकदिने अभिमुखीकरण कार्यक्रम सुदूरपश्चिम प्रदेशको अस्थायी राजधानी धनगढीमा सम्पन्न भएको छ। पार्टी अध्यक्ष केपी शर्मा ओलीले श्रव्यदृश्य माध्यमबाट कार्यक्रम उद्घाटन गर्नुभएको थियो।
नेकपा (एमाले) प्रदेश कमिटीका अध्यक्ष तथा उद्योग, वाणिज्य तथा आपूर्तिमन्त्री दामोदर भण्डारीको अध्यक्षतामा सम्पन्न अभिमुखीकरण कार्यक्रममा केन्द्रीय सचिव तथा सुदूरपश्चिम इन्चार्ज लेखराज भट्टले मिसन ग्रासरुट, स्थायी समिति सदस्य कर्णबहादुर थापाले १०औँ महाधिवेशनको कार्यभार र अर्का स्थायी समिति सदस्य बिन्दा पाण्डेले पार्टी निर्माणबारे प्रशिक्षण दिनुभएको थियो।
कार्यक्रममा केन्द्रीय कमिटी, प्रदेश कमिटीका सचिवालय सदस्य, नौवटै जिल्ला कमिटीका पदाधिकारी र जनवर्गीय सङ्गठनका प्रमुखको सहभागिता थियो। नेकपा (एमाले)ले ‘मिसन ग्रासरुट’ कार्यक्रम दुई महिनासम्म पालिकास्तरमा सञ्चालन गर्ने भएको छ।
