मकवानपुर समाचारदाता
हेटौँडा, माघ २९ गते । बागमती प्रदेश सरकारका श्रम, रोजगार तथा यातायातमन्त्री एकालाल श्रेष्ठले निर्माण व्यवसायीले ठेक्काको काम लिएर समयमा सम्पन्न नगर्ने र दायित्वबाट पन्छिन खोज्दा विकास निर्माणको काम सुस्त भइरहेको बताउनुभयो ।
तीनै तहको सरकारको ठूलो हिस्सा पूर्वाधार निर्माणलगायतका क्षेत्रमा खर्च हुने गरेको बताउँदै मन्त्री श्रेष्ठले कतिपय निर्माण व्यवसायीको काममा ढिलासुस्ती, गुणस्तरहीन कामलगायतका कारण ठेकेदारले गरेको कामप्रति सन्तुष्टि लिने ठाउँ नभएको बताउनुभयो ।
निर्माण व्यवसायी सङ्घ मकवानपुरको २३औँ साधारण सभा तथा ११औँ अधिवेशनको शनिबार हेटौँडामा उद्घाटन गर्दै उहाँले बागमती प्रदेश सरकारको पुँजीगत खर्चको अवस्था सन्तोषजनक नरहेको बताउनुभयो ।
निर्माण कम्पनीहरूले ठेक्का लिएर निर्माणमा ढिलाइ गर्ने गरेको, पुल निर्माण गर्दा एउटा खाल्डो खन्दै सुतेर बस्ने, धेरै निर्माणका काम अलपत्र पारेर छाड्ने गरेको भन्दै मन्त्री श्रेष्ठले भन्नुभयो, “निर्माण व्यवसायीका कारण काममा सन्तुष्ट लिने ठाउँ छैन, कारबाहीका लागि कठोर कदम चाल्नुपर्ने अवस्था आएको छ ।”
उहाँले निर्माणको जिम्मा लिएपछि समयमा गुणस्तरीय काम हुनुपर्ने र यसमा सबै जिम्मेवार हुनुपर्ने भन्दै निर्माण व्यवसायीले काम गर्ने सम्झौता गरेर लिएपछि दायित्वबाट पन्छिन नहुने बताउनुभयो ।
निर्माण व्यवसायीले ठेक्का पाएपछि मोबिलाइजेसनको रकमलाई छिटोछिटो धन कमाउने नाममा जग्गा खरिद–बिक्री गर्दा हाल रकम फसेको देखिएको छ भने अर्काेतिर निर्माण व्यवसायीले समयमा काम सम्पन्न नगरेका कारण राजनीतिक प्रभाव पनि पर्ने गरेको बताउनुभयो ।
नेपाल निर्माण व्यवसायी महासङ्घका वरिष्ठ उपाध्यक्ष आङ दोर्जी लामाले सरकार र समाजको निर्माण व्यवसायीलाई हेर्ने दृष्टि ठीक नभएको बताउनुभयो ।
विस्तृत कुरा नबुझी र वास्तविकता नहेरी ठेक्का हाल्नु ठेकेदारको कमजोरी हो भन्दै उहाँले पाँचभन्दा बढी ठेक्का लिन नपाउने नयाँ व्यवस्थाका सकारात्मक पक्ष रहेको चर्चा पनि गर्नुभयो ।
निर्माण व्यवसायीले आफ्नो काम, कर्तव्य र अधिकार थाहा पाउनुपर्छ र निर्माण व्यवसायीमा अध्ययन आवश्यक रहेको पनि उहाँले औँल्याउनुभयो । अन्धाधुन्ध ठेक्का हाल्ने र काम नगर्ने प्रवृत्तिले काम गर्ने ठेकेदार पनि बदनाम हुन थालेको बताउनुभयो ।
कार्यक्रममा गोरखापत्रकर्मी राममणि दाहाल, पत्रकारद्वय सुरेश श्रेष्ठ र सुवास बिडारी, अग्रज निर्माण व्यवसायी विष्णु पौडेल, हरिप्रसाद रिजाल र रामहरि अर्याल, सङ्घका कर्मचारी सुन्दर घिमिरे, मनोज रिजाल र नवराज खड्का तथा सङ्घको सदस्य रही स्थानीय तह निर्वाचन र प्रदेश सभा सदस्यमा निर्वाचित भएकाहरूलाई सम्मान गरिएको थियो ।
-square-thumb.jpg)
