तिमीसँग हिँडेका बाटाहरू
तिमीले चिनाएका मान्छेहरू
तिमीसँग पुगेका देवलहरू
सबै प्रिय लाग्छन् मलाई ।
त्यो साँझको ओर्लिंदै गरेको अँध्यारो
र हाम्रो अनुहारमा फक्रिरहेको खुसीको उज्यालो
तिमीले तौली तौली बोलेका शब्दहरू
र बेपर्वाह मैले सोधिरहेका अनगन्ती प्रश्नहरू
नबोलेरै तिमीले दिने जवाफ
र तिम्रो आँखामा प्रस्ट देखिने
प्रेमको त्यो अजम्बरी स्वरूप
सबै प्रिय लाग्छन् मलाई ।
लेख्दै मेट्दै गरेको कविताको
हरफ हो कि मेरो चाहना
रेस्टुरेन्टमा बल्दै निभ्दै गरेको
बत्ती हो कि हाम्रो सपना
तिम्रो स्पर्शमा भेटिने
आनन्द र नमेटिने प्यास,
प्राप्ति हो कि आकाशको क्षितिज ?
सबै प्रिय लाग्छन् मलाई ।
के मन पराउनु र मन पराइरहनु नै प्रेम हो ?
सदैव सँगै खोज्नु र खोजिरहनु नै प्रेम हो ?
प्रश्नहरू सबै प्रिय लाग्छन् ।
मलाई थाहा छ, म प्रेमको साधनामा छु ।
