धर्बेन्द्र झा
धनुषा, माघ ११ गते । मधेश प्रदेशमा नेकपा (माओवादी केन्द्र)बाट समानुपातिकतर्फ निर्वाचित दुई जना प्रदेशसभा सदस्यले बुधबार पद तथा गोपनीयताको शपथ लिनुभएको छ । मधेश प्रदेशको प्रदेशसभा सचिवालयमा आयोजित एक कार्यक्रमबीच नेकपा माओवादी केन्द्रकी मालाकुमारी कर्ण र रैजी हैदरले आज पद तथा गोपनीयताको शपथ लिनुभएको हो । मालाकुमारी कर्ण गाेरखापत्र संस्थानकाे सप्तरी समाचारदाता हुनुहुन्थ्याे ।
मधेश प्रदेशका मुख्यमन्त्री सरोजकुमार यादवको उपस्थितिमा प्रदेशसभाका सभामुख रामचन्द्र मण्डलले दुवै जना प्रदेशसभा सदस्यलाई शपथ गराउनुभएको छ । प्रदेशसभा सदस्य कर्णले मैथिलीमा र हैदरले उर्दू भाषामा शपथ लिनुभएको छ ।
दुवै जनाले शपथ ग्रहण गरेपछि प्रदेशसभाका सभामुख मण्डल, मुख्यमन्त्री यादवसहित शपथ ग्रहण कार्यक्रममा उपस्थित मन्त्री र संसदीय दलका नेताहरुले दुवैजना प्रदेशसभा सदस्यलाई बधाई तथा शुभकामना दिनुभयो ।
आज शपथ ग्रहण गर्नुभएका दुवै जना प्रदेशसभा सदस्यहरुले मधेश प्रदेश र यहाँका जनताको समृद्धि र विकासका लागि आवश्यक कानुन र नीति निर्माणमा इमानदारीपूर्वक भूमिका निर्वाह गर्ने प्रतिबद्धता व्यक्त गर्नुभयो ।
यसअघि दुवै जनाको विषयमा सर्वोच्च अदालतमा मुद्दा दायर गरेकाे कारण पुस १५ गतेको शपथ ग्रहण कार्यक्रममा उहाँहरुलाई शपथ नगराउन निर्वाचन आयोगले प्रदेशसभालाई पत्राचार गरेको थियो ।
दुवै जनाको मुद्दाको छिनोफानो सर्वोच्च अदालतले गरिदिएका कारण आज उहाँहरुलाई शपथ ग्रहण गराइएको हो । दुवै जनाले आज शपथ लिएपछि प्रदेश सभामा अब १०७ जना प्रदेशसभा सदस्यको सङ्ख्या पूरा भएको छ ।
-square-thumb.jpg)
