छोरी (कविता)

जीवनको सुन्दर बगैँचामा

पल्लवित छे प्रेमको स्निग्ध फूल

आज हाम्रै आँगनमा फुल्छे

सुवासित पार्छे घर

भोलि मन्दिर पुग्छे, पवित्र पार्छे मन्दिर

पर्सि पुग्छे अर्को गाउँ, अर्को देश 

र पार्छे पराई देशलाई आफ्नो देश

भग्न टहरोलाई बनाउँछे 

मायाको स्वर्णिम दरबार

बगरलाई नदी बनाउँछे

ढुङ्गालाई देवता

झारपातलाई बनाउँछे फूल

यति बेला 

यो घर पनि मन्दिर लाग्छ 

लाग्छ –

हामी संसारकै भाग्यमानी बाबुआमा हौँ

श्रद्धाले पुज्ने –

देवी हामीसँगै छे / सरस्वती हामीसँगै छे

लक्ष्मी हामीसँगै छे

र हामीसँगै छे खुसी प्रसव गर्ने

एउटी अनुपम धर्ती ।