अघोषित युद्ध (कविता)

निशब्दभित्र र कहीँ एकान्तमा 

समर्थन/विरोधका तुमुल घोषहरू

उर्लने गर्छन् हिजोआज ।

फगत म एक्लो : नयाँ महाभारत लड्दैछु

अश्वत्थामा, कर्ण र दुर्योधनहरू 

मलाई चक्रव्यूहमा फसाउँदै अट्टहास हाँस्छन्,

विजयघोष गर्छन् हिजोआज

खै किन हो

स्वयंलाई समयभन्दा बलवान ठान्छन्

भविष्यभन्दा वर्तमान् बाँच्छन् उनीहरू

कुर्लेरै बाँच्छन्,

म मौन चुपचाप र चुपचाप

रमिता हेर्छु/अन्याय सहन्छु हिजोआज

म समय

हरेक क्षण/हरेक युग

यसरी नै अविरल बहिरहने गर्दछु

म त्यस्तै झुठ र मानवता विरोधी

युग हेर्दैछु हिजोआज

चेतन मान्छेभित्रकै अहङ्कारको

अघोषित युद्ध लड्दैछु हिजोआज ।