‘निर्देशकको यात्रा’ सार्वजनिक

काठमाडौँ, पुस २० गते । दुई दशकअघि अमेरिकामा प्रकाशित चलचित्र निर्देशनसम्बन्धी पुस्तक ‘डाइरेक्टिङ फिचर फिल्मस्’को नेपाली अनुवाद निर्देशकको यात्रा सार्वजनिक भएको छ। निर्देशक मोहन राईद्वारा अनुवादित पुस्तकको अभि सुवेदी, जोएल हिबोनेट, नवीन सुब्बा, सुष्मा राईले संयुक्त रूपमा विमोचन गर्नुभयो। कार्यक्रममा बोल्दै युरोपियन युनियनकी उपराजदूत हिबोनेटले चलचित्र सञ्चारको सशक्त माध्यम भएको बताउँदै पुस्तक प्रकाशनले यो माध्यमको शक्तिलाई थप प्रभावशाली बनाउन मद्दत गर्ने धारणा राख्नुभएको थियो। 

कार्यक्रममा निर्देशक नवीन सुब्बाले निर्देशनसम्बन्धी आफूले पढेका किताबमध्ये आफूलाई मन परेको किताब निर्देशक राईले अनुवाद गर्नुभएकोमा खुसी व्यक्त गर्नुभयो।

लेखक अभि सुवेदीले मोहन राईद्वारा अनुवादित किताब चलचित्रका लागि मात्र नभएर थिएटरका लागि पनि उत्तिकै उपयोगी रहेको जानकारी दिनुभयो। अनुवादक मोहन राईले आफू यस्ता प्राज्ञिक काम निःशुल्क गर्न तयार रहे पनि यसमा संस्थागत संलग्नताको खाँचो रहेको बताउनुभयो ।