घातक रोगको उपचारका लागि दस लाख

काठमाडौँ, पुस १० गते । योगदानमा आधारित सामाजिक सुरक्षा कोषले योगदानकर्तालाई घातक रोगको औषधि उपचारका लागि १० लाख रुपियाँसम्म दिने व्यवस्था गरेको छ । उक्त सुविधा कोषमा दुई वर्ष योगदान गरेका योगदानकर्ताले पाउनेछन् । सो अवधिसम्म कोषमा योगदान गरेका योगदानकर्ताले पुस ५ गतेदेखि सेवा दाबी गर्न पाउनेछन् । 

कोषले सामाजिक सुरक्षा योजना सञ्चालन कार्यविधि, २०७५ तेस्रो संशोधन स्वीकृत भएको ९१औँ दिनबाट यो व्यवस्था लागू भएको हो । संशोधित कार्यविधि गत असोज ५ गते स्वीकृत भएको थियो । यसमा कोरोनरी आर्टरी बाइपास वा ओपन हार्ट सर्जरी, मस्तिष्क घात, मिर्गौला रोग, क्यान्सर, पार्किन्सन्स, अल्जाइमर्स, स्पाइनल इन्जुरी, हेड इन्जुरी, सिकलसेल एनिमिया र हेमोफेलिया वा थालासेमियालगायतका घातक रोगका लागि सेवा अवधिभर दस लाख रुपियाँसम्मको उपचार खर्चसमेत कोषले बेहोर्ने व्यवस्था गरिएको छ ।

कोषका सहायक प्रवक्ता रोहित रेग्मीले यो सुविधा योगदान गरेको दुई वर्षपछि र छोडेको दुई वर्ष पछिसम्म पाइने गरी व्यवस्था गरेको जानकारी दिनुभयो । उहाँका अनुसार कोषको वृद्धावस्था सुरक्षा योजनाअन्तर्गत निवृत्तिभरण प्राप्त गर्ने योगदानकर्ताले निवृत्तिभरण पाउन थालेको सात वर्षसम्म यस्तो सुविधा पाउनेछन् । 

योगदानमा आधारित सामाजिक सुरक्षा कोषमा सूचीकृत योगदानकर्ताका श्रीमान् वा श्रीमतीले पनि उपचार सुविधा पाउने भएका छन् । सामाजिक सुरक्षा योजना सञ्चालन कार्यविधि २०७५ (तेस्रो संशोधन)ले उक्त व्यवस्था गरेको हो । 

कोषका अनुसार यो सुविधा पनि पुस ५ गतेदेखि लागू भएको छ, जसमा योगदानकर्तासरह एक वर्षमा श्रीमान–श्रीमतीले एक लाख रुपियाँसम्मको औषधि उपचार सुविधा पाउनेछन् । 

कोषका अनुसार औषधि उपचारबापत अस्पतालमा भर्ना भई उपचार गराउनुपर्ने योगदानकर्ताले वार्षिक रूपमा एक लाख रुपियाँ नबढ्ने गरी खर्च पाउँछन् । अस्पतालमा भर्ना भई उपचार गराउनुपर्ने अवस्थाबाहेकका योगदानकर्ताले चिकित्सकको प्रेस्क्रिप्सनबमोजिमको सुविधा वार्षिक रूपमा २५ हजार रुपियाँ प्राप्त गर्छन् । 

तेस्रो संशोधित कार्यविधिले कोषका योगदानकर्ता बिरामी हुँदा घरमै सेवा लिन सक्ने सुविधाको व्यवस्था गरेको छ । उपचारका लागि अस्पताल आउजाउ गर्न नसक्ने अवस्था भएकालाई चिकित्सक वा स्वास्थ्यकर्मीले घरमै गई प्रदान गरेको सेवाबापतको शुल्क कोषले बेहोर्ने व्यवस्था छ । यस्तो सुविधा कोषको औषधि उपचार स्वास्थ्य तथा मातृत्व सुरक्षा योजनाअन्तर्गत पाइन्छ । 

यसअन्तर्गत चिकित्सकको परामर्श सेवा, अस्पताल भर्ना तथा शल्यक्रियाबापतको शुल्क, रोगको परीक्षण तथा उपचारबापतको खर्च र औषधिको बिलबमोजिम खर्च पनि पाइन्छ । कोषका अनुसार कोषमा हालसम्म १७ हजार ५३५ रोजगारदाता र तीन लाख ८० हजार ९८० श्रमिक सूचीकृत छन् ।