काठमाडौं, पुस ६ गते । नेपाल चिकित्सक सङ्घको आसन्न निर्वाचनमा २४ सदस्यीय पदाधिकारीका लागि २४ र सदस्यका लागि १५ गरी ३९ जना चिकित्सकहरूले मनोनयन दर्ता गराउनुभएको छ । सङ्घको नयाँ कार्यसमितिका लागि उपत्यका बाहिर ६ र ७ गते र उपत्यकामा माघ १९, २० र २१ गते निर्वाचन हुँदैछ ।
सङ्घका अनुसार एक अध्यक्ष, एक वरिष्ठ उपाध्यक्ष, ७ प्रदेश उपाध्यक्ष, एक महासचिव, एक सहसचिव, एक कोषाध्यक्ष, एक सह कोषाध्यक्ष र ६ सदस्यसहित ३९ जनाले विभिन्न पदमा मनोनयन दर्ता गराउनुभएको हो ।
अध्यक्ष पदका लागि डा. सन्तोष पौडेल, डा. अनिलविक्रम कार्की र डा. शिवजीविक्रम सिलवाल गरी तीन जनाले उम्मेदवारी दर्ता गर्नुभएको छ । त्यस्तै वरिष्ठ उपाध्यक्षका लागि डा. बद्री रिजालको मात्र उम्मेदवारी परेको छ । त्यस्तै, उपाध्यक्ष पदका लागि प्रदेश १ का प्रदेश संयोजकका लागि डा. यज्ञराज खरेल र डा. विपेस आचार्य, मधेश प्रदेश प्रदेश संयोजकका लागि डा. महेश महाशेठ, डा. निरजकुमार सिंह र डा. अजय कुमार मिश्राको उम्मेदवारी परेको छ ।
त्यसैगरी, सङ्घका अनुसार उपाध्यक्ष पदको बागमती प्रदेश प्रदेश संयोजकका लागि डा. सञ्जयकुमार ठाकुर र डा. प्रकाश बुढाथोकी, गण्डकी प्रदेश संयोजक लागि विकास गौचन र डा. रञ्जन शर्माको उम्मेदवारी परेको छ ।
उपाध्यक्षकै लागि लुम्बिनी प्रदेश प्रदेश संयोजकमा डा. नन्दकुमारी गुरुङ, कर्णाली प्रदेश, प्रदेश संयोजकका लागि डा. केशरबहादुर ढकालको उम्मेदवारी परेको छ ।
त्यसैगरी, उपाध्यक्ष पदका लागि सुदूरपश्चिम प्रदेश, प्रदेश संयोजकका लागि डा. निरज अर्याल, डा. प्रशान्त भट्ट र डा. प्रविनकुमार गिरीको उम्मेदवारी परेको छ । त्यस्तै महासचिवका लागि डा. रक्षा श्रेष्ठ, डा सञ्जीव तिवारी, र डा. अमृत भुसालको उम्मेदवारी परेको सङ्घले जनाएको छ ।
कोषाध्यक्ष पदका लागि डा. प्रमोद जोशी, सहसचिव पदका लागि डा. लिजन महर्जन, सह कोषाध्यक्ष पदका लागि डा. विक्रान्त ढकालको उम्मेदवारी परेको छ । छ जना सदस्य पदका लागि १५ जना चिकित्सकले उम्मेदवारी दर्ता गराउनुभएको छ ।
